ئەڤرۆ 80 ساڵ ل سەر ڕاگەھاندنا کۆمارا کوردستان ل مەیدانا چوارچرا ل باژێرێ مەھابادێ دەرباز دبن.
ئەڤ یادە نە بتنێ بیرەوەریا روودانەکا دیرۆکییە، بەلکو سیمبۆلا ئیرادە و ناسنامەیا نەتەوەیەکێ زیندییە، کو چ جاران ل هەمبەر سنوورێن دەستکرد و زۆرداریێ سەرێ خوە نەچەماندییە.
کۆمارا کوردستانێ قۆناغەکا زێڕینا خەباتێ بوو و وەرچەرخانەیەکا گرنک بوو دمێژووییا بزاڤا ڕزگاریخوازیا گەلێ کوردستانێ دا ب سەرکردایەتیا پێشەوا قازی محەمەد، د دەمەکێ کورت دا شیا ببیتە نموونەیا دیموکراسی و ئاڤا کرنا دامودەزگەهێن نەتەوەیی.
سەرەڕایی کەتوارێ تالێ جۆگرافی و پیلانێن نێڤدەولەتی، کۆمارێ هیڤی د دلێ هەر کوردەکێ دا چاند و بوو بنەمایەک بۆ شۆرەشێن دویڤ دا ل هەمی پارچەیێن کوردستانێ.
د ڤێ یادا پیرۆز دا، ب شانازیڤە ڕۆلێ پێشەنگ و دیرۆکی و نەتەوەیی ژەنەرال مستەفا بارزانیێ نەمر د پشتەڤانیکرنا کۆمارا کوردستانێ دا ب ڕێز و پێزانین ڤە ب بیردئێنین.
ژەنەرال بارزانی، نەک بتنێ وەک فەرماندەیەکێ سەربازی، بەلکو وەک پارێزەرێ راستەقینەیێ کۆمارێ هاتە مەیدانێ و ب قاھرەمانی ل هەمبەر هێزێن داگیرکەر ڕاوەستا.
پێدانا پلەیا (ژەنەراڵ) ب بارزانیێ نەمر و ڕادەستکرنا ئالایێ پیرۆزێ کوردستانێ، ژ لایێ پێشەوا قازی ڤە نیشانا باوەریا وی یا ڕەھا بوو ڕۆڵ و پێگەھێ مەزنێ بارزانیێ نەمر، کو ل پاشەڕۆژێ ئاڵای پارێزیت، دێ بیتە ئۆمێد و فڕیادرەسێ گەلێ کورد.
پشتی کەفتنا کۆمارێ، بارزانیێ نەمر، ئالایێ پیرۆزێ کوردستانێ و پەیاما کۆمارێ ل گەل خۆ هەلگرت و د “رێڕەوەکا مێژوویی و کێم وێنە” د دیرووکا ھەڤچەرخ دا بەرەف ئێکەتیا سۆڤیەت دچیت، و ل 11 ئەیلۆلا 1961 ئومێدا گەلێ کوردستانی ب ھەلکرنا چرایێ شۆرەشا مەزنا ئەیلوولێ بۆ ھەتا ھەتایێ زیندی دھێلیت.
ئەڤرۆ گەلێ کوردستانێ ل ژێر سێبەرا وی ئالایی و سەرکردایەتیا حەکیمانەیا جەنابێ سەرۆک مەسعوود بارزانی دا، ب ئاشتی و ئازادێ ل باشوورێ کوردستانێ دژیت و ڕۆلەکێ دیرووکی د چارەسەرکرنا دۆزا رەوایا گەلێ کورد دا، ل پارچەیێن دی یێن کوردستانێ دگێڕیت.
د دەمەکی دا کو ئەم فێ یادا پیرۆز، مینا میراتەکێ مەزنێ نەتەوەیی و نیشتیمانی ب بیردئینین، د ھەمان دەم دا و ب مفا وەرگرتن ژ ئەزموونا سەرکەفتیا وێ کۆمارێ، تەکەزێ ل سەر ئێکڕێزیا ناڤ مالا کوردی و پاراستنا دەستکەفتێن هەرێما کوردستانێ و پشتەڤانیا خویشک و برایێن خوە ل ڕۆژئاڤایێ کوردستانێ دکەین.
سڵاڤ 80ـەمین سالیادا کۆمارا کوردستان.
سڵاڤ ل گیانێ پاکێ شەهیدێن کۆمارێ و تەڤایا شەهیدێن رێیا ئازادیا کوردستانێ و سەر کاروانێ شەھیدان بارزانیێ نەمر و کاک ئیدریسێ ھەردەم ساخ.
بژیت کورد، بژیت کوردستان.
