ب ڕێز و شکۆیەکا مەزن ڤە 52مین سالڤەگەڕا سێدارەدانا سیمبۆڵا خۆڕاگری و ئازادیخوازیا گەلێ کوردستانێ، شەھیدا نەمر لەیلا قاسم و هەڤالێن وێ، ب بیر دئینین.

خەباتکارا مەزنا کورد، لەیلا قاسم و هەڤالێن وێ یێن قارەمان د ڕێیا ئازادیا کوردستانێ دا، پاراستنا کەرامەتا و مافێن ڕەوایێن گەلێ کورد و ژیانەکا سەربەرز، گەهشتینە پلەیا بلندا نەمریێ.

شەهید لەیلا قاسم، وەک ئێکەم ئافرەتا کورد، ژبەر ناسنامەیا خۆ یا نەتەوەیی و دادپەروەریا دۆزا ڕەوا یا گەلێ کوردستانێ، د ژیێ 22 ساڵی دا، ب بڕیارەکا ھۆڤانە یا ڕژێما عێراقێ ل 12 گولانا ساڵا 1974 ھاتە سێدارەدان.

ڕژێما عێراقێ ب سێدارەدانا لەیلا قاسم، وەکو ئێکەم ئافرەت د دیرووکا سەردەمدا، کەتە بەر شەرمەزاریەکا مێژوویی، لەیلا قاسم ژی دبەرفرەھترین دەرگەھان دا، کەتە دناڤ لاپەڕێن زێڕینێن دیرووکا گەلێ خۆ و تەڤایا مرۆڤایەتیێ دا.

چوونا لەیلا قاسم ب وێرەکی بەر ب خلفا سێدارێ، نازناڤێ (بووکا کوردستانێ) ب شانازیڤە ب دەستڤەئینا و بوو پێشەنگا خەباتا ئافرەتا کورد و سیمبۆڵەکا جیهانی ل سەر ئاستێ خەباتا نیشتیمانی و ئازادیا گەلێن بندەست.

دەمێ ئەم ل مەکتەبا ڕێکخستنا پارتی دیموکراتی کوردستان ل بەهدینان، ڕۆژا سێدارەدانا ڤێ کەسایەتیا بلندا نیشتیمانی ب بیر دئینین، دھەمان دەم دا تەکەزێ دکەین کو خوینا شەهید لەیلا قاسم و ھەڤالێن وێ یێن قەهرەمان، دێ بنە چرا و ڕێنیشاندەر بۆ بەرەبابێن پاشەڕۆژێ، کو ل سەر ھەمان بیرو باوەر و پرەنسیپێن نیشتیمانی و بهایێن خەباتێ بەردەوامبن، تا هەمی خەون و ھیڤیێن گەلێ مە بدەستڤە دهێن.

ھەر دڤێ یادا خەمگین دا پەیمانێ بۆ گەلێ خۆ یێ سەربەرز نوو دکەین، کو ل سەر وێ ڕێبازا نیشتیمانی و نەتەوەیی یا ڕێبەرێ نەمر مستەفا بارزانی کێشای بەردەوامبین، بۆ بەرەڤانیکرن ژ مافێن گەلێ خۆ و پاراستنا ئێکڕێزی و سەقامگیریا کوردستانێ و جێگیرکرنا بهایێن پێکڤەژیان، برایینی و ئاشتیێ.

نەمری ئارامی بۆ گیانێ پاکێ لەیلا قاسم، بووکا کوردستانێ و تەڤایا شەھیدێن ڕێیا ئازادی وسەرفەرازیا گەلێ کوردستانێ و سەروەرێ شەھیدان بارزانیێ نەمر و کاک ئیدریسێ ھەردەم ساخ.

مرن و شەرمەزاری بۆ بکوژێن بووکا کوردستانێ و ھەڤالێن وێ. بژیت کورد و کوردستان و کوردستان ھەرا ئارام و ئاڤەدان بیت.

مەکتەبا ڕێکخستنا پارتی دیموکراتی کوردستان ل بەهدینان
12ی گولانا 2026