ئەڤرۆ، ڕۆژا ئێکشەمبی ڕێکەفتی 24ێ گولانا 2026ێ، ب ئامادەبوونا بەڕێز سەربەست لەزگین، ئەندامێ مەکتەبا سیاسی و بەرپرسێ مەکتەبا ڕێکخستنا پارتی دیموکراتی کوردستان، دکتۆر نەوزاد عەبدوللا بەرپرسێ لقێ ئێک، شڤان مەحمود سکرتێرێ ئێکەتیا قوتابیان و لاوێن کوردستانێ و ب پشکدارییا نێزیکی 1800 قوتابی و لاوان، لقێ دھۆک یێ ئێکەتیا قوتابی و لاوێن کوردستانێ چالاکیەکا بەرفرەھ، ب ھەلکەفتا یۆبیلا زێڕینا شۆڕشا 26ێ گولانێ ڕێکخست.

ل دەستپێکا ڕێورەسمان دا، بەرپرسێ مەکتەبا ڕێکخستنێ پشکداری د ڤەکرنا پێشەنگەھەکا فوتۆگرافی یا تایبەت ب وێستگەھێن جودا جودا یێن شۆڕەشا 26ێ گولانێ دا کر، و پاشان پەیڤەک پێشکەش کر.

بەڕێز سەربەست لەزگین د پەیڤا خۆ دا، ب هووربینی ڕۆناھی ئێخستە سەر وان کاودان و ئاستەنگێن دژوار یێن کو ژ ئەنجامێ ڕێککەفتنامەیا خیانەتکارانە یا 6ێ ئادارا جەزائێرێ ب سەر گەلێ کوردستانێ دا هاتبوونە سەپاندن، کو ئارمانجا سەرەکی، ژناڤبرنا بزاڤا ڕزگاریخوازی و ڕێگریکرنبوو ل سەرھەلدانا شۆڕەشێن کوردی، لێ بەروڤاژی پیلانێن داگیرکەران، گەلێ کوردستانێ ل ژێر سەرکردایەتیا حەکیمانە یا بابێ ڕۆحیێ نەتەوا کورد، بارزانیێ نەمر، و ب چاڤدێریا ڕاستەوخۆ یا جەنابێ سەرۆک مەسعود بارزانی و کاک ئیدریسێ ھەردەم ساخ، شیا پیلانێن دوژمنان سەروبن بکەت و چریسکا شۆڕەشا 26ێ گولانا 1976ێ وەکو درێژەپێدەرا شۆڕەشا مەزنا ئەیلوولێ ھەلکەت و ببیتە ھێڤێنێ ڤەگەڕاندنا ھیڤی و ئومێدێ بۆ سەرجەم تەخ و چینێن گەلێ کوردستانێ.

د پشکا دی یا پەیڤا خۆ دا، بەرپرسێ مەکتەبا ڕێکخستنێ ئاماژە ب وێستگەھێن مێژوویی و ستراتیژی یێن شۆڕشا 26ێ گولانێ کر و ڕۆڵێ دیرووکیێ قوتابی و لاوان د شۆڕشێ دا و تیشک ئێخستە سەر وان ستەم و زۆرداریا ڕژێما بەعسا ژناڤچوویی یا کو ل دژی مللەتێ کورد پەیرەو دکر، لێ ل دوماھیێ ئیرادەیا پولایین یا گەلێ کوردستانێ سەرکەفت و کوردستانێ ئازاد بوو و قەوارەیێ سیاسی و دەستووریێ ھەرێما کوردستانێ هاتە چەسپاندن، و سیستەمێ دکتاتۆری یێ بەعس بۆ حەتا حەتایێ کەفتە د زبڵدانا مێژوویێ دا.