شەهيدێ گەنج رسول محەمەد عەلی بادى ل سالا ١٩٥٣ ل گوندێ بادێ ل پشت گەلیێ دهۆکێ هاتیە دنیایێ.
خواندنا سەرەتاى هەر ل خواندنگەها گوندێ بادێ تەمام کریە.
بابێ شەهيد رەسولی ل سالا ١٩٥٨ بوویە بەرپرسێ رێكخراوا پارتى ل گوندێ بادێ.
شەهيد رسول ژی د ژیەکی گەلەک بچووک دا و ل سالا ١٩٦٧ بوويە پێشمەرگە ل هـێزا شێخان.
دەمێ ساڵا ١٩٧٥ شوڕشا ئەیلولێ ژ ئەنجامێ پەیمانا جەزائیرێ تووشی شکەستنێ بووی، هەرچەندە وی دەمی هێشتا ژیێ رەسولی 22 ساڵ بوو، بەلێ وی کەتوارێ شکەستنێ ڕەدکر و بەرێ خوە دا ژیانا دەربەدەریێ ل ئیرانێ. پێشیێ ل زێوە ل دەڤەرا مەرگەڤەڕ و پشتی هینگێ ل جەهروم و پاشی ل بەندەر بوشەهر ل ژێریا ئیرانێ هاتە ئاکنجیکرن.
لێ ژ بەر کو عەشقا شورشێ و کوردستانێ ببوو ئاگرەک و کەفتبوو دلێ رەسولێ گەنج، ئەو ب هەموو رێکا ل ڕێیەکێ دگەڕیا کو خوە بکەهینتەڤە چیایێن کوردستانێ و دەست ب خەباتێ بکەت ل دژی داگیرکەران، لۆما وی لگەل کۆمەکا هەڤالان ل ڕۆژا ١٩٧٦/١٠/١٥ خوگەهاندە چەپەرێن شەرەفێ ل چیایێن کوردستانێ.
شەهید رەسول هەر ئێکسەر دەمێ گەهەشتیە دەڤەرا بەهدینان سنوورێ هەرێما ئێک، ئەو کەفتە لگەل مەفرەزەیەکا پێشمەرگەی و دەست ب چالاکیێن لەشکەری کر ل دژی دوژمنی، ژ وان ژی:
١- پشكدارى د شەرێ گه ليێ بالندا دا
٢- پشكدارى د شەرێ هرورێ دا
٣- پشكدارى د شەرێ نزدورێ دا
٤- پشكدارى د شەرێ هوركی دا.
مخابن د دەمەکی دا کو شەهید ڕەسول و هەڤالێن خوە، پشتی ژ گەڕەکا پێشمەرگاتیێ ژ ناڤ کووراتیا باشوورێ کوردستانێ زڤڕین و ل بارەگایێ پێشمەرگەی ل بێلمبیرێ ل ناڤبەرا زنارا کێستە و سنوورێ باکوورێ کوردستانێ بێنا خوە ڤەددا، ل سپێدەیا رۆژا 22/5/1977 هێزەکا تایبەتا لەشکەرێ دوژمنی ب فرۆکەیێن هەلیکۆپتەر هێرش کرە سەر وان، هەم ل سێ ئالیێن پێشمەرگەی لەشکەر بەردانە سەر ئەردی و هەم ژی ژ ئاسمانی ئەو دانە بەر شێلکێن گوللە و ڕۆکێتان.
شەڕ گەلەک دژوار بوو و د ئەنجامدا هەژمارەکا مەزن ژ دوژمنی هاتنە کوشتن. لێ مخابن د ئەنجامێ ڤی شەڕی دا 14 کادر و پێشمەرگە شەهید بوون و رەسولێ 24 ساڵی بچووکی هەمیا بوو.
دوماهیێ ژی دوژمنی تەرمێ هەرسێ شەهیدان زۆراب عبدالعزيز پشتیوان و حەجی یەحیا شالی/قەشوری و رەسول محەمەد عەلی بادی ب هەلیکۆپتەران ئینانە کانیماسێ و هەرسێ د چالەکێ دا ل رەخێ گۆرستانا گوندێ دێریشکی ڤەشارتن.
