رۆژا ئەینی 30ێ کانوونا دویێ یا 2026، پەیوەندییەکا تەلەفۆنی د ناڤبەرا سەرۆک مەسعوود بارزانی و بەڕێز «تۆم باراک» نێردەیێ تایبەتێ سەرۆک ترامپ بۆ کاروبارێن سووریا هاتە ئەنجامدان.
د پەیوەندیێ دا، بەڕێز تۆم باراک ب ناڤێ خۆ و ب ناڤێ سەرۆکێ ویلایەتێن ئێکگرتیێن ئەمریکا، سوپاسی و پێزانینێن تایبەت ئاراستەی سەرۆک بارزانی کرن بۆ وی رۆل و هەلوێستێن بەرچاڤیێن د ئەنجامدانا ئاگربەستێ و پشتەڤانیکرنا دیالۆگێ د ناڤبەرا حکوومەتا سووریا و هێزێن سووریایا دیمۆکرات دا نیشان دایی.
هەروەسا ڕۆلێ سەرۆک بارزانی د دەستڤەئینانا ڕێککەفتنا ئەڤرۆ یا د ناڤبەرا حکوومەتا سووریا و هێزێن سووریایا دیمۆکرات دا بلند نرخاند.
هەر د وێ پەیوەندیێ دا، سەرۆک بارزانی زێدەباری دەربڕینا سوپاسی و پێزانینێن تایبەت بۆ بەڕێز سەرۆکێ ئەمریکا و هەمی ئەو کەس و لایەنێن ڕۆل هەبووی کو کێشە ب ڕێیا دیالۆگێ بهێنە چارەسەرکرن، پشتەڤانییا خۆ بۆ ڕێککەفتنا ئەڤرۆ ئەینی 30ی کانوونا دویێ یا 2026 دیار کر، ئەو ژی پێخەمەت جێگیرکرنا ئاشتیێ.
هەروەسا سەرۆک بارزانی سوپاسیا بەڕێز تۆم باراک کر بۆ وی ڕۆلێ کاریگەرێ د گەهشتنا ڕێککەفتنێ و ئاشتیێ ل دەڤەرێ ب گشتی و ل سووریا ب تایبەتی هەبووی.
دەربارەی بارودۆخێ عێراقێ ژی، بەڕێز تۆم باراک داخواز ژ سەرۆک بارزانی کر کو د ڕەوشا سیاسی یا نوکە یا عێراقێ دا ڕۆلێ خۆ یێ گرنگ و بەرچاڤ بگێڕیت.
ژ لایێ خۆ ڤە سەرۆک بارزانی جەخت ل سەر وێ چەندێ کر کو مەرجێ سەرەکیێ سەقامگیریێ و چارەسەرکرنا کێشان، جێبەجێکرنا دەستووری و پێگیربوونە ب وێ چەندێ کو پێکهاتەیێن عێراقێ بخۆ بڕیارێ ل سەر چارەنڤیسێ وەڵاتێ خۆ بدەن و سەروەرییا عێراقێ بپارێزن.
