ئەڤڕۆ دوشەمبی، 16ێ شواتا 2026، ب ئامادەبوونا بەرپرسێ لقا 8 یا پارتی دیموکراتی کوردستان، سەرۆکایەتییا زانکۆیێ، هەژمارەکا بەرچاڤ یا مامۆستا و نوینەرێن لقێ و قوتابیێن زانکۆیێ، سمینارەکا تایبەت بۆ بەرێز (سەربەست لەزگین)، ئەندامێ مەکتەبا سیاسی و بەرپرسێ مەکتەبا ڕێکخستنا پارتی ل پارێزگەھا دھۆکێ و ئیدارەیا سەربەخۆیا زاخۆ، هاتە ئەنجامدان.

ناڤەڕۆکا سمینارێ ل ژێر ناڤێ: “ڕۆلێ سەرۆک بارزانی د ئازراندن و بلندکرنا ھەستێ نەتەوەیی دا” بوو.

د سمینارێ دا، بەرێز سەربەست لەزگین ب هووری تیشک خستە سەر کەسایەتی و کاریزمایا نەتەوەیی یا جەنابێ سەرۆک مەسعوود بارزانی، کو چەوان شیایە ببیتە هێزا بزاڤکەر بۆ بلندکرنا هەستێ کوردایەتیێ، نەک تەنێ ل هەرێما کوردستانێ، بەلکو ل سەر ئاستێ هەر چار پارچێن کوردستانێ.

ئاماژە ب وێ چەندێ ژی دا کو جەنابێ سەرۆک هەردەم وەک سێوانە و چەترەکا نەتەوەیی بوویە بۆ کۆمکرنا هەمی کوردان و پاراستنا ناسنامەیا وان ل هەر کێدەرەکێ بن.

هەروەسا بەرێز سەربەست لەزگین بەحسێ هەلویستێن دیرۆکی و نشتیمانی یێن جەنابێ سەرۆک کر، نەخاسمە د پشتەڤانیکرنا رۆژئاڤایێ کوردستانێ دا. تیشک خستە سەر وێ چەندێ کو ب فەرمانا جەنابێ وی هێزێن پێشمەرگەی گەهشتنە کۆبانێ، و ل ڤێ دوماهیێ ژی ب هەول و دبلوماسییەتا جەنابێ وان، مەترسییا قڕکرنێ ل سەر گەلێ مە ل رۆژئاڤایێ کوردستانێ هاتە دوورکرن.

د پشکەکا دی دا، دەرگەهێ دانوستاندنێ بۆ ئامادەبوویان هاتە ڤەکرن و چەندین تێبینی و دیتنێن زانستی ل سەر بابەتێ سمینارێ هاتنە گەنگەشەکرن.