بەری 39 سالان ل 31 کانوونا دووێ 1987، پارتی دیمۆکراتی کوردستان و بزاڤا ڕزگاریخوازییا گەلێ کوردستانێ، د دەمەکێ گەلەک هەستیار دا ئێک ژ سەرکردەیێن خوە یێن هەرە مەزن ژ دەست دا؛ ئەوێ سەرۆک مەسعوود بارزانی د وەسفکرنا ویدا دبێژیت: «مرۆڤەکێ گەلەک مەزن بوو، مەزناهییا وی ژی ژ تێگەهشتن و پێگەهشتنا وی ھێزا خۆ وەردگرت.»
کاک ئیدریس بارزانی د هەمی ویستگەهـ و قۆناغێن شۆڕەشا گەلێ مە دا، ڕۆلەکێ کاریگەر و مێژوویی هەبوو. د ناڤ ڕێزێن شۆڕشا ئەیلۆلێ دا، د بیاڤێ کار و دیسپلینا حزبی و لەشکەری دا، کارەکتەرەکێ خودان سەنگ و هاریکارێ نێزیک و جهێ باوەریا بارزانیێ نەمر بوو.
کاک ئیدریس، مل ب ملێ جەنابێ سەرۆک مەسعوود بارزانی ڤە، پشکدارەکێ سەرەکیێ دانوستاندنێن شۆڕشێ بوو، دگەل حکۆمەتا عێراقێ، کو رێککەفتننامەیا 11ێ ئادارا 1970ێ بەرهەمێ وێ کەد و تێکۆشانێ بوو.
پشتی نسکۆیا شۆڕەشا ئەیلۆلێ ژی، ڕۆلەکێ بەرپرسیارانە د هاریکاریکرنا پەنابەر و کۆچبەرێن ل ڕۆژهەلاتێ کوردستانێ و ئیرانێ گێڕا، بوو هەلگرێ ئێش و ئازارێن خەلکێ لێقەومایی.
کاک ئیدریس دگەل جەنابێ سەرۆک مەسعوود بارزانی، ب ئیرادەیەکا پۆڵایین ل هەمبەر پیلانگێڕیێن دوژمنان ڕاوەستان و کەتوارێ سەپاندیێ پشتی نسکۆیێ رەتکر.
سەرەڕای هەمی فشار و دوورپێچان، ب رووحیەتا کوردایەتیێ و باوەریبوون ب دۆزا گەلێ کوردستانێ، دەست ب سەر ژ نوی ڕێکخستنا پارتی کر و بڕیارا دامەزراندنا سەرکردایەتیا دەمکی بۆ وێ قۆناغا خەباتێ و هەلگیرساندنا شۆڕشا گولانێ دا.
ژبەر باوەرییا وی یا کوور ب خەباتا هەڤپشک و بەرچاڤگرتنا بەرژەوەندیێن بلندێن نەتەوەیی، کاک ئیدریس گاڤێن ژیرانە د چەسپاندنا ئاشتەوایا ناڤخۆیی دا هاڤێتن و بەری بنیاتێ «بەرەیێ کوردستانی» دانا، لەوما ب شانازی ڤە نازناڤێ «ئەندازیارێ ئاشتیێ» پێ هاتە بەخشین.
کاک ئیدریسێ جانەمەرگ، دەرچوویێ قوتابخانەیا نەتەوەیی و نیشتمانی و هەلگرێ هەمی ساخلەتێن رێبەرێ مەزن بارزانیێ نەمر بوو.
هەرچەندە ئەو کێم ژیا، لێ مەزن ژیا و میراتەکێ دەولەمەندێ شۆڕەشگێڕی، کوردایەتی، حیکمەت و وانەیێن مروۆڤایەتیێ ل پاش خوە هێلان.
ئەم وەک مەکتەبا رێکخستنا پارتی دیموکراتی کوردستان ل پارێزگەها دهۆکێ، د 39 سالڤەگەرا وەغەرا دووماهییا کاک ئیدریسێ جانەمەرگ دا، ب رێز و وەفاداری ڤە رۆل و خەباتا وی ب بیر دئینین. سەرێ رێز و نەوازشێ بۆ وی و تەڤایا شەهیدێن ڕێیا ئازادی و سەرفەرازیا گەلێ کوردستانێ و سهر کاروانێ شەهیدان بارزانیێ نەمر دچەمینین.
سۆزێ نوو دکەینەڤە کو ل ژێر سەرکردایەتیا جەنابێ سەرۆک بارزانی، پێشمەرگێن ب وەفایێن رێبازا پیرۆزا بارزانی و ل سەڕ شۆپا کاک ئێدریسێ جانەمەرگ بەردەوام بین، حەتا ب دەستڤەئینانا دووماهی ئارمانجێن گەلێ مە.
سڵاڤ ل سەر گیانێ پاقژێ کاک ئیدریس بارزانی و هەمی شەهیدێن کوردستانێ.
کوردستان هەر ئارام و ئاڤەدان بیت.
مەکتەبا رێکخستنا پارتی دیمۆکراتی کوردستان ل پارێزگەها دهۆکێ
30 کانوونا دووێ 2026
