ب هەلکەفتا 22ـەمین سالڤەگەرا کارەساتا 1ێ شوباتێ
کەسۆکارێن سەربلندێن شەهیدان، جەماوەرێ خۆڕاگرێ کوردستانێ، ئەڤرۆ 22 ساڵ ب سەر کارەساتا دلتەزین و تیرۆرستیا ١ێ شوباتا 2004ێ دا دەرباز دبن.
ئەو ڕۆژا کو دوژمنێن مرۆڤایەتیێ و گەلێ کوردستانێ، جەژنا قوربانێ کریە دەلیڤە بۆ ئەنجامدانا تاوانەکا هۆڤانە دژی گەلێ مە. د وێ رۆژێ دا، تیرۆرستێن رەشپەرێس ب دوو کریارێن خۆکوژی، بارەگایێ لقێ 2 یێ پارتی دیموکراتی کوردستان و مەلبەندێ 3 یێ ئێکەتیا نیشتیمانی یا کوردستانێ ل هەولێرا پایتەخت کرنە ئارمانج.
ئەڤ کارەساتە نەک تنێ برینەکا کوور بوو، بەلکو بەلگەیەکێ زەلال بوو کو دوژمنێن مە چ جاران فەرق و جوداهیێ د ناڤبەرا چ لایەن و ڕەنگێن جودا یێن کوردستانی دا نەکرینە.
ئارمانجا وان ژناڤبرنا ئیرادە و دەستکەفتیێن مللەتێ مە بوو، لێ خوینا تێکەلکری یا سەرکردە و کادر و پێشمەرگە و خەلکێ سڤیل یێ هەردوو لایەنان، بووە هەڤینێ بێهێزکرنا پیلانێن دوژمنی.
ئەم وەکو مەکتەبا ڕێکخستنا پارتی ل پارێزگەها دهۆکێ، د ڤێ بیرەوەریێ دا تەکەزێ ل ئێکڕێزی و تەباییا تەڤاییا ھەمی هێز و لایەنێن سیاسی دکەین و ب تاکە ڕێیا پاراستنا ھەرێما کوردستانێ و دەستکەفتیێن گەلێ مە دزانین.
ئێکڕێزیا ناڤ مالا کوردی مەزنترین وەفاداری بۆ خوینا پاکا شەهیدێن 1ێ شواتێ و هەمی شەهیدێن ڕێکا ڕزگاریخوازییا کوردستانێ.
د ڤێ بیرەواریا خەمگین دا سەری ڕێز و نەوازشێ بۆ گیانێ پاکێ شەهیدێن 1ێ شواتێ و تەڤایا شەھیدێن کوردستانێ و سەرکاروانێ شەھیدان بارزانیێ نەمر و کاک ئیدریسێ ھەردەم ساخ دچەمینین.
نەمان بۆ تیرۆر و رەشپەرێسان
سەرفەرازی بۆ گەلێ کوردستانێ.
مەکتەبا ڕێکخستنا پارتی دیموکراتی کوردستان / پارێزگەها دهۆکێ
1ێ شوباتا 2026
