ب هەلکەفتا 18ێ شواتێ، 73ـەمین سالڤەگەڕا دامەزراندنا هەردوو ڕێکخراوێن تێکۆشەر و پێشەنگ (ئێکەتییا قوتابیێن کوردستانێ) و (ئێکەتییا لاوێن دیموکراتا کوردستانێ)، گەرمترین پیرۆزباهییان ئاراستەی تەخا زیندی، پڕ وزە و داهێنەرا قوتابی و لاوێن سەربلندێن کوردستانێ دکەین.

دامەزراندنا ڤان هەردوو ڕێکخراوان ب بڕیارەکا دیرۆکی و دووربینانە ژ لایێ بابێ ڕۆحیێ نەتەوا کورد، بارزانیێ نەمر، وەرچەرخانەیەکا مەزن و ستراتیژی بوو د ڕێڕەوا خەباتا ڕزگاریخوازییا گەلێ مە دا.

بارزانیێ نەمر ژ ئەنجامێ بەرپرسیاریەکا مێژوویی و باوەریەکا مکوم ب ڕۆڵێ کارایێ گەنجان و هەستکرن ب گرنگیا ڕێکخستنا هێز و ڤەژەنا قوتابی و لاوان پێخەمەت خزمەتکرنا ئارمانجێن بلندێن نەتەوەیی و نیشتیمانی، ل 18ێ شوتا 1953 بڕیارا دامەزراندنا ڤان ھەردوو ڕێکخراوێن پێشەنگ، کو ھەر ژ وێ ڕۆژێ وەرە بووینە قوتابخانەیەکا نیشتیمانی یا کومکرن و ڕێکخستن و گەشەپێدانا شیانێن قوتابی و لاوان پێخەمەت خزمەتکرنا ئاخ و وەڵاتی.

قوتابی و لاوێن مە، هەمیشە ئەو تەخا هوشیار و خۆڕاگر بووینە کو چ جاران ل هەمبەر زۆرداریێ بێدەنگ و بێ هەلویست نەبووینە. ڕۆڵێ وان یێ قەهرەمانانە د ناڤ بزاڤا ڕزگاریخوازییا کوردستانێ دا، ب تایبەت د ناڤ ڕێزێن شۆڕشێن ئەیلولا مەزن و گولانا پێشکەفتنخواز دا، و پشکداریا وان یا کارا د سەرهەلدانا پیرۆز دا، گۆپیتکا دڵسۆزی و نیشتیمانپەروەریێ بوو.

ئێکەتیا قوتابی و لاوێن دیموکراتا کوردستانێ، ب درێژاهییا دیرۆکا خوە، ب تنێ ڕێکخراوەکا پیشەیی نەبوویە، بەلکو لاندکا پێگەهاندنا سەرکردان بوویە و ب دەهان سەرکردەیێن لێهاتی و خودان ئەزموون د ناڤ ڤان ڕێکخراوان دا هاتینە پەروەردەکرن، کو دوهی د سەنگەرێن شۆڕشێ دا و ئەڤڕۆ د ناڤ جومگێن جودا یێن حکۆمەتا هەرێما کوردستانێ دا ب دلسۆزی خزمەتێ دکەن.

هەروەسا، ڤێ ڕێکخراوێ کاروانەکێ مەزنێ شەهیدێن قەهرەمان پێشکێشی ڕێیا ئازادی و سەرفەرازییا کوردستانێ کرینە.

ئەم وەک مەکتەبا ڕێکخستنا پارێزگەها دهۆکێ، ب شانازییەکا مەزن ڤە ڕۆڵێ پێشەنگێ قوتابیێن سەرەڕم و شورەیا پۆلایینا لاوان د قۆناغا ئاڤاکرنا جڤاکێ سڤیل و قادا زانست و پێشکەفتنێ دا بلند د نرخینین. لاو و قوتابی ستوونا پاشەڕۆژا کوردستانێ و ئومێدا گەلێ مە نە بۆ پاراستنا دەستکەفتێن نەتەوەیی و نیشتیمانی و بدەستڤەئینانا تەڤایا خەون و ئارمانجێن مە یێن ڕەوا.

دووبارە ئەڤ یادە ل تەڤایا قوتابی، لاو، مالباتێن سەربلندێن شەهیدان و گەلێ کوردستانێ پیرۆز بیت.
هەر شاد و سەرکەفتی بن..
کوردستان هەر ئارام و ئاوەدان بیت..