ئەڤرۆ 22ێ شواتێ 2026ێ، 38 سال ب سەر دەسپێکرنا زنجیرەیا تاوانێن ئەنفالێن ڕەش دەرباز دبن، ئەو جینۆسایدا ڕژێما بەعسا ژناڤچوویی ب پلانەکا دارێژتی ل دژی گەلێ کوردستانێ، ب ھەژمارەکا ئوپەراسیۆنێن سەربازی ب چەکێ کیمیایی یێ قەدەغەکری ل دژی گەلێ کوردستانێ ھاتە ئەنجامدا.

پڕۆسەیا ئەنفالان، تەنێ کریارەکا سەربازی نەبوو، بەلکو هەوڵەکا تاری و شکەستخواریا ڕژێما ژناڤچوویا بەعس بوو، ژ بۆ گھۆڕینا دیموگرافیا کوردستانێ و سڕینا ناسنامەیا گەلێ کورد کو ل ھەمبەر ھەمی باھۆزان مینا چیایێن خۆ یێن خوڕستی، ب خۆڕاگری و نەچەمیایی مایە.

ڕژێما دکتاتۆرا بەعس د هەشت قۆناغێن تژی تاوان و دیمەنێن تراژیدی و دوور ژ هەموو بەهایێن مرۆڤایەتیێ، پتر ژ 4500 گوندێن کوردستانێ وێرانکرن و ژیان تێدا ڕاوەستاندن، 182 هزار خەلکێ سڤیلێ کوردستانێ، ژ ژن و زاڕۆک و پیر و گەنجێن بێگونەهـ، ل بیابانێن ژێریا ئیراقێ ب ساخی بنئاخکرن، داکو ملەتێ کورد قر بکەن.

ڕاستە ئەنفال برینەکا کوورە د جەستەیێ مللەتێ مە دا و هەتا ئەڤرۆ ژی ئێش و ئازارێن وێ تاوانێ د دلێ هەر کوردەکێ نیشتمانپەروەر دا زیندی مایە، لێ ئیرادەیا گەلێ کوردستانێ ب سەرکەفت و ئەڤرۆ کوردستان ل سایا سەرۆک بارزانی و حکۆمەت و سازیێن خۆ یێن دەستووری یا ب ھێز و ئازادە، هەروەسا دوژمنێن گەلێ کوردستانێ بووینە پشکەکا ڕەش ژ دیرووکەکا پڕی شەرمەزاری.

ئەم وەکو مەکتەبا ڕێکخستنا پارتی ل پارێزگەھا دھۆکێ، د ڤێ یادا دلتەزین دا، سەرێ رێز و نەوازشێ ل ھەمبەر مەزناھیا شەھیدێن ئەنفالێن ڕەش دچەمینین و دوپات دکەین کو ئەرکێ مە هەمیانە داکۆکیێ ل مافێن کەس و کارێن ئەنفالکریان بکەین و برینێن وان بکەینە ڕێبازا کوردایەتیێ و پرێن ئێکڕیزیێ و ئێکگرتنێ و پاراستنا دەستکەفتێن نەتەوی و نیشتیمانی.

هەزاران سلاڤ ل گیانێ پاکێ شەهیدێن ئەنفالێن گەرمیان، بارزان، بەھدینان و هەموو شەهیدێن ڕێکا ڕزگاریا کوردستانێ و سەروەرێ ھەمی شەھیدان بارزانیێ نەمر و کاک ئیدریسێ ھەردەم ساخ.

مرن و سەرشۆری بۆ تاوانبارێن ئەنفالان.
ھەر بەرز و بلندبیت ئەلایێ پیرۆزێ کوردستانێ و ھەر ئارام و ئاڤەدان بیت.