ب ناڤێ خودایێ یێ مەزن و دلۆڤان
ل ئێکێ ئادارێ ل ھەمی ساڵان، گەلێ کوردستانێ ب ڕێز و پێزانین و وەفادارییەکا مەزن ڤە، ل هەمبەر مێژوویا پڕ سەروەریا ڕێبەرێ ئەفسانەیی و بابێ رووحیێ نەتەوا کورد” بارزانیێ نەمر” ڕادوەستیت.
بارزانیێ نەمر، ئەو زاتێ مەزن بوو، کو پتر ژ نیڤ سەدەی سەرکێشیا دۆزا ڕەوایا گەلێ کورد کری، ئەو ڕێبەرێ قۆناغەکا دیارکری نەبوو، بەلکو ئەندازیارێ داڕشتنا ناسنامەیا نەتەوا کورد و بنیاتنەرێ وەرچەرخانێن هەستیار و چارەنڤیسسازێن بزاڤا ڕزگاریخوازییا گەلێ مە بوو.
بارزانییێ نەمر، وەکو قوتابخانەیەکا هزری و فەلسەفی، شیا سایکۆلۆژیا تاکێ کورد ژ بازنەیێ بێ ئومێدیێ دەربێخیت و بەرەڤ باوەری ب خۆبوونێ ببەت و ب ئیرادەیەکا پۆڵاین ئاراستە بکەت.
کاریزمایا بارزانیێ نەمر و کەسایەتیا وی یا خودان هەیبەت، بۆ گەلێ کودستانێ، بوو ئاوێنەیا “ئارامیێ و سەقامگیریا دەروونی ل هەمبەر تەنگاڤیان و د ناڤا سەختیێن خەباتێ و ستەما داگیرکەران دا، شیا تۆڤێ ئیرادەیەکا خوەڕستی و باوەرییەکا موکم ب دادپەروەرییا دۆزا گەلێ خوە بچینیت.
میرات و ڕێبازا پیرۆزا بارزانیێ نەمر، ئەوا ل سەر بنەمایێن کوورێن خوداناسیێ، مرۆڤدۆستی و دادپەروەرییێ هاتیە ئاڤاکرن، کو تێدا کەرامەتا مرۆڤی، د سەر هەمی پیرۆزییان ڕا دهێتە دیتن، ب درێژاھیا خەباتا خوە یا بێ ڕاوەستیان دا ڕەنگڤەدابوو.
بارزانیێ نەمر د قۆناغەکا دژوارا مێژوویێ دا، دەما کو جەنگێ سار سێبەرا خوە ب سەر ھەموو کوژیکێن جیهانێ دا بەردای و بەرژەوەندیێن زلهێزان بووینە سەنگێ مەحەک بۆ ڕەوایەتی و چارەسەریا ھەمی کێشە و ئالۆزیان، بارزانییێ نەمر د وێ هەڤکێشیا ئاسێ و ئاڵۆز دا، سەنگ و پێگەهێ دۆزا ڕەوایا گەلێ خوە پاراست و ئالنگارییا کەتوارێ جیۆپۆلیتیکی یێ کوردستانێ کر، ب وێ یەکێ ژی شیا ئومێدا مان و سەرکەفتنێ بۆ مللەتێ خوە ڤەگەڕینیت.
بارزانییێ نەمر، ل پال سەرکردایەتیا نەتەوەیی، مرۆڤپەروەری ب بنەمایێ هزر و فەلسەفەیا خوە ددیت و ب کریار، ب دێژاھیا ژیانە خوە، ئەو باوەری پەیرەو دکر، چ جاران جوداهی د ناڤبەرا پێکهاتە، ئایین و ئایینزایان دا نەدکر. هەلویستێ وی یێ مێژوویی د ژییێ گەنجاتیێ دا، دەما ب هەژمارەکا چەکداران ڤە، د هەوارا سەرکردەیێ ئەرمەنی (ئاندریانیک ئۆزانیان) دا چووی و ئەو و خێزانا وی ژ کوشتارا ئۆسمانییان ڕزگارکرین، بەلگەیەکێ زیندیێ مرۆڤدۆستیا ڤی زاتێ مەزنە.
شۆڕشگێری ل دەڤ بارزانی ب رامانا دادپەروەرییا گشتی و “یەکرێزییا نەتەوەیی دهات. بەرهەمێ ڤێ باوەرییێ بوو، وەک چەوا ل سالا 1919ێ، ب سەرکێشییا 300 جەنگاوەران بەرەڤ سلێمانیێ ب ڕێکەتی بۆ پشتەڤانییا شۆڕشا شێخ مەحموودێ حەفید.
ھزرا وی یا پێشوەخت بۆ پاراستنا ژینگەهێ کو سەرچاڤێ خوە ژ کانیا زەڵاڵ و پڕ دەولەمەندا کەلتوورێ کوورێ بارزان، وەک ئەمانەتەکێ خودایی وەرگرتبوو، نیشانا پەیوەندی و گرێدانا وی یا ڕوحی بوو، ب پیرۆزییا ئاخ و سروشتێ وەلاتی.
ژ شۆڕشێن بارزان تا ڕاگەهاندنا کۆمارا کوردستان ل مهابادێ و ئەو قوربانێین مەزنێن دبەر پاراستنا وی دەستکەفتیێ نەتەوەیی داین، و دامەزراندنا پارتیا دایک ( پارتی دیموکراتی کوردستان ) ل سالا 1946ێ، بارزانیێ نەمر ل پێشەنگیا خەباتا ڕێکخراوەیی و ستراتیژی یا بزاڤا ڕزگاریخوازیا گەلێ کورد دھێلیت.
ڕێپیڤانا مێژوویی یا بارزانیێ نەمر و 500 ھەڤالێن بۆ ئێکەتیا سۆڤیەت، نە بتنێ لاپەڕەیەکێ زێڕین و پڕشەنگدارێ خەبات و خۆڕاگریی و ڕەتکرنا کەتوارێ شکەستن و ڕادەستبوونێ بوو، بەلکو وەرچەرخانەیا دیرووکی بوو، د ئاراستەیا دۆزا ڕەوایا گەلێ کوردستانێ دا، نەمازە دەرێخستنا پرسا کوردی ژ چارچۆڤەیێ وێ یێ بەرتەنگ و دائێخستیێ ناڤخۆیی، بەرەف ناڤەندێن نیڤدەولەتی.
هەلگیرساندنا شۆڕشا مەزنا ئەیلۆلێ ب ڕێبەرایەتیا بارزانیێ نەمر، کو تاکە شۆڕشا سەرتاسەریا گەلێ کوردستانێ بوو، سەلماندنا وێ ڕاستیێ بوو کو ماف ب حیکمەت و خۆڕاگریێ و قوربانیدانێ دهێنە ستاندن.
ھەر ژ ئەنجامێ وێ حیکمەت و گیانێ خۆڕاگریا بارزانیێ نەمر د ناڤ گەلێ خوەدا چاندی، ڕێکەفتنا 11ێ ئادارێ، وەکو بەلگەیەکێ مێژوویی لێ ھاتە بەرھەم و دوژمن نەچارکر کو بۆ جارا ئێکێ د دیرووکا ھەڤچەرخا گەلێ کوردستانێ دا، دانپێدانێ ب بەشەکێ مافێن گەلێ کورد بکەت.
بەری 47 سالا ل ڕۆژەکا وەکی ئەڤرۆ ل 1ێ ئادارا 1979ێ ڕحا پاک و پیرۆزا بارزانیێ نەمر بەرەڤ دلۆڤانیا خودایێ خوە فڕی، بازانیێ نەمر وەکو جەستە ل ناڤ گەل و وەڵاتێ خوە بارکر، لێ میراتەکێ مەزنێ ھزری و فەلسەفی و دەولەمەند ب بەھا و پرەنسیپێن شۆڕشگێری، مرۆڤایەتی، ئازادی و یەکسانی و دادپەروەری ل پاش خوە ھێلا، لەوما ل ڕۆژا وەفاتا وی، ب سەدان هزار وەفادارێن ڕێبازا وی ژ هەر چار پارچەیێن کوردستانێ ل ڕێوڕەسمێن بخاکسپارتنا وی ل گۆرستانا شنۆ ل ڕۆژھەلاتێ کوردستانێ ئامادەبوون، و پەیمانا بەردەوامیێ ب وێ ڕێبازێ نووکرەڤە.
پشتی ڤەگوھازتا ڕوفاتا وی یا پیرۆز دگەل ڕوفاتا کاک ئیدریسێ ھەردەم ساخ بۆ ھەمبێزا بارزانا لاندا شێران دا، ژ وێ ڕۆژێ وەرە مەزارگەھێ نەمران، ب وێ سادەیا خوەیا خوەزایی، بوویە قیبلەگەھا نیشتیمانپەروەرێن ھەر چار پارچەیێن کوردستانێ و جیھانێ.
ئەم وەک مەکتەبا ڕێکخستنا پارتی ل پارێزگەها دهۆکێ، د ڤێ یادا پڕ خەمگین دا و ب باوەریەکا وەرگرتی ژ ھزر و میراتێ بارزانیێ نەمر و ل ژێر سیبەر و سەرکێشیا لێڤەگەڕێ گەلێ کوردستانێ جەنابێ سەرۆک مەسعود بارزانی، وەفادارییا خوە بۆ ڕێبازا پیرۆزا بارزانیێ نەمر نوودکەینەڤە و پەیمانێ ددەین کو ل دووف ڕێ و شۆپا ڕێبەر و ڕێزانێ گەلێ خوە و بەردەوامین ل سەر خزمەتکرنا خەلکێ خۆ یێ خۆشتڤی و پاراستنا گەلێن خوە، ھەتا ب دەستڤەئینانا دوماھی خەون و ئارمانجێن گەلێ مە.
نەمری بۆ گیانێ پڕ پیرۆزێ بابێ رووحی یێ نەتەوەیا کورد، بارزانیێ نەمر.
سەرفەرازی بۆ پێشمەرگێن قارەمان و خێزانێن سەربلندێن شەهیدان.
ھزار سڵاڤ ل گیانێ پاک و پیرۆزێ تەڤایا شەھیدێن کورد و کوردستانێ و سەروەرێ کاروانێ شەھیدان بارزانیێ نەمر و کاک ئیدریسێ ھەردەم ساخ، بەرز و بلندبیت ئالایێ پیرۆزێ کوردستانێ و کوردستان ھەرا ئارام و ئاڤەدانبیت.
مەکتەبا ڕێکخستنا پارتی دیموکراتی کوردستان ل پارێزگەها دهۆکێ
1ێ ئادارا 2026
