ب ناڤێ خودایێ مەزن و دلۆڤان، ئەڤرۆ 56 ساڵ ب سەر ڕێککەفتنامەیا 11ێ ئادارا 1970ێ دا دەرباز دبن، ئەو ڕوودانا مێژوویی یا کو ژ ئەنجامێ قوربانییێن بێ وێنە یێن پێشمەرگێن قەھرەمان و خوینا پیرۆزا ھزاران شەھیدان و خۆڕاگری و ئیرادەیا پۆلایین یا گەلێ کوردستانێ د شۆڕەشا ئەیلۆلا مەزن دا، ب ڕێبەریا بابێ رۆحیێ نەتەوا کورد بارزانیێ نەمر، ب دەستڤە ھاتی و بوویە لاپەرەیەکێ زێڕین د دیرۆکا خەبات و بزاڤا ڕزگاریخوەزیا گەلێ مە دا.

ڕێکەفتنا 11ێ ئادارێ د وی سەردەمی دا، وەکو گاڤەکا مێژوویی بۆ دانپێدانێ ب پشکەک ژ مافێن گەلێ کوردستانێ و چەسپاندنا بنەمایێن چارەسەریەکا ئاشتیانە بۆ دۆزا گەلێ مە ل باشوورێ کوردستانێ دهێتە هەژمارتن. لێ مخابن، پاشگەزبوونا ڕژێما عێراقێ یا وی سەردەمی ژ ڕێکەفتن و پابەندییێن خۆ، دەلیڤەیەکا مێژوویی ژ دەست دا، کو دشییا ببیتە دەستپێکا ئاڤاکرنا قۆناغەکا نوو یا سەقامگیریا سیاسی و پێکڤەژیانا ڕاستەقینە دناڤبەرا گەلێ کورد و عەرەب و تەڤایا پێکاھاتەیێن دی ل کوردستانێ و عێراقێ دا.

ئەڤ یادا شکۆدار، نە ب تنێ لاپەرەکێ پڕشەنگدارێ دیرۆکا گەلێ مەیە، بەلکو بەلگەنامەیاکا زندییە ژ حەقانیەتا دۆزا ڕەوایا ملەتەکێ خۆڕاگر و ڕێبەرەکێ دادپەروەر و دووربین، کو سەرەڕای ھەمی ئاستەنگ و بارودۆخێن دژوار و ھەڤکێشەیێن ئاسێ و ئالۆزدا، شیا ب پشتبەستن ب شیانێن گەلێ خۆ، گھۆڕینەکا بنەڕەتی د تێگەھێ دۆزا کوردی دا دروست بکەت و ل سەر خەباتێ خۆ بەردەوامبیت، تاکو دوژمن نەچاری دانوستاندنێ و دانپێدانێ ب پشکەکا مافێن گەلێ کوردستانێ بکەت.

ئەم وەکو مەکتەبا ڕێکخستنا پارتی دیمۆکراتی کوردستان ل پارێزگەها دهۆکێ، د ڤێ هەلکەفتنا مێژوویی دا، ب شانازی و شکۆداری ڤە ڕۆلێ دیرووکی و ئەفسانەییا بارزانیێ نەمر و قوربانیێن پێشمەرگێن قەهرەمانێن شۆڕەشا ئەیلۆلا مەزن و خوینا پیرۆزا شەهیدێن زیندی ب بیردئێنین و دوپات دکەینەڤە کو ژێر ڕێبەریا جەنابێ سەرۆک مەسعوود بارزانی بەردەوام بین و پارێزگاریێ ل بنەمایێن نەتەوەیی یێن گەلێ کوردستانێ کەین و مافێن دەستووری و دەستکەفتێن سیاسی د ھەمێ قۆناغ و ئاستەنگێن جودا دا بپارێزین.

دڤێ یادا مەزن و پیرۆزدا تەکەزێ دکەین کو پاشەڕۆژا عێراقێ و سەقامگیریا وێ گرێدایی ڕێزگرتن و پابەندبوونا ھێزێن سیاسی و بڕیار بدەستێن عێراقییە، ب پەیمان و ڕێکەفتنان و وان بنەمایێن عێراقا نوو ل سەر ھاتیە ئاڤاکرن، ب ئاوایەکێ کو دادپەروەری، وەکهەڤی و هەڤپشکییا ڕاستەقینە د سیستەمێ سیاسی و ئیداریێ عێراڤێ دا بھێتە پەیرەوکرن و پێگیریەکا تەمام ب مافێن یاسایی و دەستووریێن ھەرێما کوردستانێ بھێتە کرن.

یادا 11ێ ئادارێ دێ هەردەم مینا سیمبولێ سەرکەفتنا ئیرادەیا ئازاد یا گەلێ کوردستانێ مینیت و دێ بیتە چرایەکێ گەش بۆ نڤشێن نوو و داھاتی، کو وانەیێن قوربانیدانێ و باوەریێ ب دادپەروەریا دۆزا ڕەوایا گەلێ کوردستانێ وەربگرن، تا ئەو دەمێ ھەمی هیڤی و ئارمانجێن گەلێ مە بدەستڤەدھێن.

ل دوماھیێ سەرێ ڕێز و نەوازشێ بۆ شەھیدێن شۆڕەشا ئەیلۆلا مەزن و تەڤایا شەھیدێن کوردستانێ و سەرکاروانێ شەھیدان بارزانیێ نەمر و کاک ئیدریسێ ھەردەم ساخ دچەمینین.

ھزار سڵاڤ ل خەبات و خۆڕاگریا پێشمەرگێن قەھرەمان.
سەرکەفتن بۆ گەلێ کوردستانێ و کوردستان ھەر ئارام و ئاڤەدان بیت.

مەکتەبا ڕێکخستنا پارتی دیمۆکراتی کوردستان ل پارێزگەها دهۆکێ
11ێ ئادارا 2026