ب ناڤێ خودایێ مەزن و دلۆڤان
د 35 سالیادا کۆچا ملیۆنی یا گەلێ کوردستانێ دا، ئەم ئێک ژ مەزنترین داستانێن مرۆڤایەتی د دیرووکا گەلێ خۆ دا ب بیر دئینین، ئەو کۆچا نەچاری کو دەزگەھێن سەرکوتکرن و ستەمکاریێن ڕژێما “بەعس” ب سەر خەلکێ کوردستانێ دا سەپاندی، و د ئەنجامدا ب سەدان هزار ژن و زەڵام و زاڕۆکان ئێش و ئازارێن خۆ ھەلگرتن و بەرەف چۆل و چیا و چارەنڤێسەکێ نەدیار بڕێکەتن.
کۆچا ملیۆنی د بهارا 1991ێ دا، وەرچەرخانەکا دیرووکی یا گرنگ بوو د کاروانێ بزاڤا ڕزگاریخوازیا گەلێ کوردستانێ دا. ئەو کۆچە ب تنێ کارەساتەکا مرۆڤی نەبوو، بەلکو خالەکا ستراتیژی بوو د گھۆڕینا دیدا جڤاکێ نیڤدەولەتی دا ھەمبەر دۆزا گەلێ کورد. وێ کارەساتێ ویژدانا جیهانێ و تەڤایا مرۆڤایەتیێ هشیار کر و بوو ئەگەرێ دەستێوەردانا سازیێن نیڤدەولەتی، کو د ئەنجام دا “دەڤەرا ئارام” و دژە فرینێ هاتە سەپاندن، ئەڤە ژی بوو ئەو پێنگاڤ، یا کو بناغە بۆ پاراستنا گەلێ مە ژ زۆردارییا ڕژێما بەعسا دیکتاتۆری دانای.
قوربانیدانێن مەزنێن کۆچا ملیۆنی، سەرەڕای ھەمی ئالنگاریان، رێ خۆش کر بۆ بدەستڤەئینانا دەستکەفتێن دیرووکی، کو د ئاڤاکرنا قەوارەیەکێ سیاسی و ئیداری دا ل هەرێما کوردستانێ و چەسپاندنا ئەزموونەکا سەرکەفتی یا حوکمڕانیێ و ئاڤاکرنا سازیێن دەستووری و دیموکراتی ڕەنگڤەدا.
د ڤێ هەلکەفتێ دا، ئەم ل مەکتەبا رێكخستنا پارتی دیموکراتی کوردستان ل پارێزگەها دهۆکێ دوپات دکەین، کو وانەیێن کۆچا ملیۆنی د ویژدانا مە دا، دێ ب زیندی مینن، و مە ھانددەن کو پتر ژبۆ تەبایی و ئێکڕێزیا ناڤ مالا کوردی و پاراستنا دەستکەفتێن نەتەوەیی، ل هەمبەر هەمی مەترسیێن هەرێما کوردستانێ دکەنە ئارمانج ڕاوەستین.
هەروەسا پەیمانێ بۆ گەلێ خۆ و خوینا شەهیدان نوو دکەین کو ل سەر رێبازا بارزانیێ نەمر بەردەوامیێ ب کاروانێ خەباتێ بدەین، پێخەمەت پاراستنا کەرامەتا گەلێ خۆ و مسۆگەرکرنا پاشەڕۆژەکا گەش و ئارام بۆ نڤشێن ئەڤرۆ و داھاتی.
ل دیماھیێ سەرێ ڕێز و نەوازشێ بۆ شەهیدێن کۆچا ملیۆنی و تەڤایا شەھیدێن کوردستانێ و سەرکاروانێ شەھیدان بارزانیێ نەمر و کاک ئیدریسێ ھەردەم ساخ د چەمینین.
ھەر بەرز و بلند بیت ئالایێ کوردستانێ و کوردستان ھەرا ئارام و ئاڤەدان بیت.
مەکتەبا رێكخستنا PDK ل پارێزگەها دهۆکێ
