ل سالڕۆژا ڕووخانا ڕژێما بەعس یا دیکتاتۆر دا، گەلێ کوردستانێ ب ئێش و ئازارەکا کوور ڤە ئەڤێ قۆناغا تژی ستەم و زۆرداریێ ب بیر دئینیت. ئەو سەردەمێ ڕەش ئەوا کو ل سەر دەستێ دەستهەلاتەکا دکتاتۆر و خۆسەپێن، گەلێ مە یێ ئاشتیخواز ڕووبڕووی دڕندەترین تاوانێن مرۆڤایەتیێ بووی، ژ هەڵمەتێن ئەنفال و کیمیابارانێ و ڕاگوهاستنا ب زۆری، تا دگەهیتە وێرانکرنا ب هزاران گوند و ئاڤەدانیا ل کوردستانێ.

ئەو هەمی تاوانە بزاڤەکا شکەستخواری یا وێ ڕژێمێ بوو، هەمی ژ پێخەمەت شکاندنا ئیرادە و ژناڤبرنا دۆز و بەرخوەدانا ملەتێ کورد.

ڕووخانا ڕژێما فاشییا بەعس، وەرچەرخانەکا ستراتیژی و مێژوویی بوو د قادا سیاسی یا عێراق و کوردستانێ دا. د وی سەردەمیدا گەلێ عێراقێ ب گشتی و یێ کوردستانێ ب تایبەتی چاڤەڕێی ئاسۆیەکێ نوو و سیستەمەکێ حوکمڕانیا مەدەنێ دکر کو ل سەر بنەمایێ دادپەروەری و دیموکراسیێ بهێتە ئاڤاکرن و دوماهی ب سەردەمێ بێبەشکرن و خۆسەپاندنێ بھێت.

لێ مخابن، پشتی بورینا 23ێ سالان، ئەو هیڤی و ئۆمێدێن ل سەر وی بنەمای ھاتینە ئاڤاکرن ل ئاست قوربانیێن مەزن ئەوا گەلێ مە دایی نەبوون، چونکی گوهۆڕینا ڕژێمەکا دکتاتۆر نەبوویە ئەگەرێ ژناڤچوونا وێ عەقلیەتا دکتاتۆر و خۆسەپێن، و نەبوویە بنەمایەکێ جێگر بۆ ئاڤاکرنا دەولەتەکا مەدەنی ل سەر بنگەهێ هەڤپشکیا ڕاستەقینە.

مخابن سەرەڕایی ژ ناڤچوونا ڕژێما بەعس و دەسھەڵاتا تاکڕەوی، ئەڤڕۆ ژی هەرێما کوردستانێ د قۆناغەکا هەستیار دا دەرباز دبیت و ڕووبڕووی ئالنگاریێن مەزن دبیت ڤە، ژ بۆردومانێن بەردەوام بگرە حەتا دگەهیتە فشارێن ئابووری، هەروەسا هەوڵێن برسی کرنێ و سەپاندنا ئیرادەیا سیاسی یا ب زۆری. ئەڤ کریار و رەفتارانە بنپێکرنەکا ئاشکرایە د دەستوور و رحا تەباییا نشتیمانی ئەوا د بنەمایێن عێراقا نوو دا سەر ھاتیە ئاڤاکرن.

ئەم ل مەکتەبا ڕێکخستنا پارتی دیموکراتی کوردستان ل پارێزگەها دهۆکێ، د ڤێ یادێ دا پەیمانا بەردەوامیێ ل سەر خەباتا مەدەنی و دەستووری نوو دکەینەڤە.

جەختێ ل سەر پاراستنا مافێن ڕەوایێن گەلێ خۆ و پارێزگاریکرنێ ل دەستکەفتێن نەتەوەیی و نیشتیمانیێن گەلێ خۆ دکەین، ئەو دەستکەفتێن ب خوینا گەشا شەهیدان و قوربانیێن پێشمەرگەیێن قارەمان ب دەستڤەھاتین.

ل دوماهیێ، داخوازێ ژ هەمی هێز و لایەنێن نیشتیمانی دکەین کو پێداچوونێ ب ڕێڕەوا سیاسیا خۆ دا بکەن و ڤەگەڕن بۆ بنەمایێن ڕاستەقینە یێن هەڤپشکیێ، داکو دەولەتەکا دادپەروەر و مەدەنی و دوور ژ تائیفەگەریێ ئاڤا ببیت. دەولەتەک کو مافێ هەمی پێکهاتان بێ جوداهی بپارێزیت و دویر بیت ژ سیاسەتا پەراوێزخستن و خۆسەپاندنێ.

ھزار سڵاڤ ل گیانێ پاکێ ھەموو شەھیدێن دەستێ ڕژێما بەعس و تەڤایا شەھیدێن کوردستانێ و سەروەرێ شەھیدان بارزانیێ نەمر و کاک ئیدریسێ ھەردەم ساخ.

ھەر بەرز و بلند بیت ئالایێ کوردستانێ و کوردستان ھەر ئارام و ئاڤەدان بیت.

مەکتەبا ڕێکخستنا پارتی دیموکراتی کوردستان ل پارێزگەها دهۆکێ
٩ێ نیسانا ٢٠٢٦ێ