ب هەلکەفتنا ڕۆژا ڕۆژنامەگەریا کوردی و دەربازبوونا 128 ساڵان ل سەر دەرکەتنا ڕۆژنامەیا (کوردستان) کو ل 22ێ نیسانا سالا 1898ێ ل قاهیرەیا پایتەختێ مسرێ ل سەر دەستێ ڕاگرێ ڕۆژنامەگەریا کوردی “میقداد مەدحەت بەدرخان پاشا” ڕۆناھی دیتی، گەرمترین پیرۆزباھیان ئاراستەی تەڤایا ڕۆژنامەڤان و میدیاکارێن کوردستانێ دکەین، ھیڤیدارین ب بەرپرسیاری ڤە، ل ئاست خەما گەل و وەڵاتێ خۆ دابن و ھەوڵ و ماندیبوونا وان، پێخەمەت مافێن گەلێ کورد و گەھاندنا ڕاستیێ و خزمەتکرنا بیاڤێ ڕۆژنامەگەریێ دا بن.
دەرکەتنا ڕۆژنامەیا کوردستان بەری 128 ساڵان، وەرچەرخانەیەکا دیرۆکیبوو د ڕێڕەوا هشیاریا نەتەوەیی و ڕەوشەنبیریا گەلێ کورد دھێتە هەژماردن.
ڕۆژنامەگەریا کوردستان ژ دەسپێکا وەشانا خۆ ڤە، سەکۆیەکێ ئازادبوو بۆ بەرگریکرن ژ مافێن گەلێ مە و ئامرازەکبوو بۆ بەلاڤکرنا هشیاریا نیشتیمانی و پاراستنا ناسنامەیا کوردی ل هەمبەر هەمی هەولێن ژناڤبرن و پشتگوێخستنا زمان، کەلتوور و دیرووکا گەلێ مە.
د ڤی بیاڤی دا، پارتی دیموکراتی کوردستان ڕۆلەکێ پێشەنگ و دیار هەبوویە د پشتەڤانیکرن و پێشخستنا ڕۆژنامەگەریا کوردی دا، چونکی پارتی ھەر ژ دەمێ دامەزراندنا خۆ، باوەری ب ئازادیا ڕادەربڕینێ و گرنگیا ڕاگەهاندنا ئازاد، د بەلاڤکرنا ھزرا نەتەوەیی و ئاڤاکرنا جڤاکەکێ دیموکراسی دا و دابینکرنا مافێن ڕەوایێن گەلێ خۆ ھەبوو.
پارتی دیموکراتی کوردستان سەرەڕایی قۆناغێن سەختێن شۆڕش و خەباتێ، پشکداربوویە د دامەزراندن و پشتەڤانیکرنا چەندین ڕۆژنامە، گۆڤار، ئێزگە و دەزگەهێن ڕاگەهاندنێ دا، و ڕۆلەکێ بەرچاڤ هەبوویە د پاراستنا ڕۆژنامەڤانان دا و دابینکرنا ژینگەھەکا ساخلەم بۆ کارێ ڕاگەهاندنێ، هەروەسا کار کریە بۆ ب هێزکرنا گۆتارەکا نیشتیمانی و بەرپرس، کو گوزارشێ ژ هیڤی و داخوازێن گەلێ کوردستانێ بۆ ئازادی، دیموکراسی و پێکڤەژیانا ئاشتیانە بکەت.
ئەڤرۆ ل هەرێما کوردستانێ، ژ ئەنجامێ پەیرەوکرنا پرەنسیپێن دیموکراسیێ و ئازادیا ڕادەربڕینێ و ب مفا وەرگرتن ژ شۆڕەشا تێکنولۆجییا زانیاریان، ئەم پێشکەفتنەکا بەرچاڤ د بیاڤێ ڕاگەهاندنێ دا ل کوردستانێ دبینین، کو پارتی دیموکراتی کوردستان ب ڕێکا پشتەڤانیکرنا دەزگەهێن ڕاگەهاندنێ، فرەهکرنا مەودایێ ئازادیان و هاندانا شیانێن ڕۆژنامەڤانێن گەنج ڕۆڵێ پێشەنگ و سەرەکی د چەسپاندنا وان بنەمایاندا ھەبوویە.
ئەم د ڤێ هەلکەفتنێ دا، سلاڤان بۆ هەمی ڕۆژنامەڤانێن کورد و کوردستانی دهنێرین، یێن کو پێنڤێس و بەرھەمێن ھزرا خۆ بۆ بەرگریکرنێ ژ ڕاستیێ تەرخانکرین، و جەختێ ل سەر گرنگیا پێگیریێ ب پیشەییبوون و بابەتیبوونێ دکەین، پێخەمەت بەردەوامیدان ب پەیاما پیرۆزا ڕۆژنامەگەریێ د چارچۆڤێ خزمەتکرنا گەل و وەڵاتی دا.
سەربلندی و نەمری بۆ پێشەنگێن ڕۆژنامەگەریا کوردی و شەھیدێن ھزرا ئازاد و دۆزا ڕەوایا گەلێ کوردستانێ.
سلاڤ بۆ هەر پێنڤێسەکێ خزمەتا ئێکەتی و ئێکڕێزیا گەلێ کوردستانێ دکەت.
مەکتەبا ڕێکخستنا پارتی دیموکراتی کوردستان ل بەهدینان
22ێ نیسانا 2026ێ
