کەس و کارێن سەربلندێن شەھیدان، پێشمەرگەیێن قارەمان و جەماوەرێ خۆڕاگرێ پارێزگەھا دھۆکێ، ئەڤڕۆ 35 سال ب سەر سەرھەلدانا مێژوویی یا گەلێ کوردستانێ دا دەرباز دبن.

ل ڕۆژەکا وەکی ئەڤرۆ و ل 5ێ ئادارا 1991ێ، ل باژێڕکێ ڕانیایێ ئێەکەم چریسکا ڕاپەڕینا سەرتاسەری ل کوردستانێ گەشبوو، کو زوو هەمی باژێڕ و گوندێن کوردستانێ ڤەگرت و گەھشتە کەرکووکا دلێ کوردستانێ.

ئەڤ وەرچەرخانا مێژوویی، بەرھەمێ ب دەھان سالان خەبات و قوربانیێن پێشمەرگەیێن قارەمانێن شۆڕشا ئەیلۆلا مەزن و گولانا پێشکەفتخواز بوو، کو ل ژێر فەرماندەییا حەکیمانەیا جەنابێ سەرۆک مەسعوود بارزانی و ئێکڕێزیا تەڤایا هێزێن سیاسی، خەونێن گەلێ مە بۆ ئازادیێ بوونە ڕاستی و قەوارەیێ سیاسی یێ هەرێما کوردستانێ دەرئەنجامێ وێ خەباتێ هاتە چەسپاندن.

د دەمەکێ دا کو ئەم یادا ڤێ روودانا دیرووکی پیرۆز دکەین، جیھان ب گشتی و دەڤەرا ڕۆژھەلاتا ناڤین د ناڤ ئالۆزیێن مەزنێن سیاسی و لەشکری دا دەرباز دبن، نەخاسمە ئەو گرژی و ململانەیێن ل ناڤبەرا جەمسەرێن نێودەولەتی و هەرێمی دا دروست بووین.

د ئەنجامێ ڤان هەڤکێشەیێن ئالۆز دا، مخابن چەندین جاران هەولێرا پایتەخت و ئیرادەیا گەلێ مە بوویە ئارمانجا مووشەک و درۆنێن میلشیاتیێن ژ یاسا دەرچووی، ب مەرەما لاوازکرنا قەوارەیێ هەرێمێ، لێ یا جهێ شانازیێ ئەوە کو ب سەرکردایەتیا لێهاتی یا سەرۆک بارزانی، شیایە کوردستانێ د ناڤ ڤان پێلێن دژوار دا ب بپارێزیت و بەرەڤانیێ ژ کیان و دەستکەفتێن گەلێ کوردستانێ بکەت.

ئەم وەک مەکتەبا ڕێکخستنا پارتی ل پارێزگەھا دھۆکێ، د ڤێ یادێ دا دووپات دکەین کو خەلکێ پارێزگەھا دھۆکێ دێ هەر وەک کەلھا پشتەڤانا بێوێنە یا ڕێبازا بارزانی مینیت. پاراستنا دەستکەفتێن سەرھەلدانێ ئەرکێ مە یێ هەرە پیرۆزە و دێ بەردەوام بین ل سەر خزمەتکرنا جەماوەرێ خۆ یێ دڵسۆز و ب هێزکرنا ئێکڕێزیا نشتیمانی بۆ ڕووبڕووبوونا هەمی ئالنگاریان.

د ڤێ یادا شکۆدار و پیرۆزدا سەرێ ڕێز و نەوازشێ بۆ گیانێ پاکێ شەھیدێن سەرھەلدانێ و تەڤایا شەھیدێن کوردستانێ و سەروەرێ شەھیدان بارزانیێ نەمر و کاک ئیدریسێ ھەردەم ساخ دچەمینین.

بژیت کورد و کوردستان، کوردستان ھەرا ئارام و ئاڤەدان بیت.

مەکتەبا ڕێکخستنا پارێزگەھا دھۆکێ
پارتی دیموکراتی کوردستان
5ێ ئادارا 2026