ب ناڤێ خودایێ مەزن و دلۆڤان، ئەڤرۆ 38 سال ل سەر ئێک ژ دڕندەترین تاوانێن قڕکرنا گەلێ کوردستانێ دەرباز دبن، کو ئەو ژی تاوانێن ئەنفالێن ڕەشن یێن کو ڕژێما بەعسا ژناڤچووی ب ھەشت قۆناغێن جودا و ب ئارمانجا ژناڤبرنا مڕۆڤ، ئاخ، ناسنامەیا گەلێ مە و شکاندنا ئیرادەیا مە ب ھەمی چەک و جەبلخانەیا خۆ یا لەشکەری و ب پشکداریا ب سەدان ھزار سەرباز و کرێگرتیێن خۆ بجھئێنای.
ڕژێما بەعسا ژ ناڤچوویێ د پڕۆسەیێن ئەنفالێن ڕەش دا ھەناسەیا ب هزاران خەلکێ سڤیل و بێ دەسھەڵاتێ کوردستانێ، ب چەکێ کیمیاوی چککر، ب هزاران گوند وێرانکرن، ب دەھان ھزارا ژن و زاڕۆک مینا دیلێن لەشکەری گرتن و ب زۆری ڕاگوهاستن بۆ بیابانێن ژێریا عێراقێ و ب ساخی دگۆڕێن ب کۆمدا بن ئاخکرن.
ئەڤ تاوانا قڕکرنا ب کۆم، یا دوور ژ ھەموو پرەنسیپ و بھایێن مرۆڤایەتیێ، گۆپیتکا ھۆڤاتی و ڕوویێ ڕاستێ وێ ڕژێمێ نیشا جیھانێ دا، ھەتا ھەتایێ مینا برینەکا کوور د بیردانکا مرۆڤایەتیێ و دیرووکا گەلێ مەدا ب ساخی مینیت.
سەرەڕای مەزناهیا کارەساتا ئەنفالان، گەلێ کوردستانێ سەلماند کو ئیرادەیا وی ژ هەمی چەک، بزاڤێن چەوساندن و قڕکرنێ بێهێزترە.
لەوما د ئێکەم دەلیڤەدا و ب ئیرادەیەکا پۆلایین ل بھارا 1991ێ دژی دام و دەزگەھێن سەرکوتکارێن وێ ڕژێمێ ڕاپەڕین و ئاخا خۆ ب کەرکووکا دلێ کوردستانێ ڤە ئازد کر و ئەو ڕژێم ژ ناڤچوو و بۆ لاپەڕەکێ ڕەش و شەرمەزاریێ بۆ دیرووکا عێراقێ و کۆمەلگەھا نیڤدەولەتێ.
دەمێ ئەم ل مەکتەبا ڕێکخستنا پارتی دیموکراتی کوردستان ل پارێزگەها دهۆکێ، ڤێ کارەساتا دلتەزین ب بیر دئینین، د ھەمان دەمدا دوپاتییێ ل وەفاداریا خۆ بۆ خوینا شەهیدێن سەربلند دکەین، و پەیمانا خۆ نویدکەینەڤە بۆ بەردەوامیدان ب خەبات و تێکۆشانێ ژ پێخەمەت پاراستنا ماف و کەرامەتا گەلێ مە و گەرەنتیکرنا دووبارەنەبوونا ڤان جۆرە تاوانان د پاشەڕۆژێ دا.
هەروەسا داخوازێ ژ جڤاکێ نیڤدەولەتی دکەین، بەردەوامبیت ل سەر ناساندنا ئەنفالان داکو تاوانا جینۆسایدکرنا گەلێ کوردستانێ و ئاشکرا کرنا وان ھەمی کەس و کومپانیێن تەکنولۆژیا چەکێ کیمیاوی دایە ڕژێما بەعسا ژ ناڤچوویی، ل گۆرەیی یاسایا نیڤدەولەتی بھێنە سزادان.
پێدڤییە ل سەر حکۆمەتا عێراقا فیدرال ژی، ب بەرپرسیاریا خۆ یا یاسایی و ئەخلاقی ڕابیت و ب رژدی کاربکەت ل سەر قەرەبووکرنا قوربانی و زیانڤێکەفتیێن ئەنفالان و نەھێلانا شوینوارێن وان تاوانان.
د ڤێ هەلکەفتنێ دا وەک وەفاداریەک بۆ خوینا شەھیدان و مسۆگەرکرنا پاشەڕۆژەکا گەش و ئارام بۆ بەرەبابێن داھاتی، جارەکا دی تەکەزێ ل سەر گرنگیا ئێکڕیزیا نشتیمانی، و ب هێزکرنا بەهایێن پێکڤەژیان و ئاشتیێ و چەسپاندنا بنەمایێن دادپەروەریێ پرەنسیپێن دیموکراسیێ و مافێ مرۆڤی دکەین.
نەمری و سەرفەرازی بۆ قوربانی و شەهیدێن ئەنفالان و تەڤایا شەھیدێن کوردستانێ و سەر کاروانێ شەھیدان بارزانیێ نەمر و کاک ئیدریسێ ھەردەم ساخ.
ھەر بەرز و بلند بیت ئالایێ کوردستانێ و کوردستان ھەرا ئارام و ئاڤەدان بیت.
مەکتەبا ڕێکخستنا پارتی دیموکراتی کوردستان ل پارێزگەها دهۆکێ
14ێ نیسانا 2026ێ
