ئەڤرۆ گەلێ کوردستانێ ب گشتی، پێشمەرگە، کادر، ئەندام و جەماوەرێ دڵسۆزێ پارتی دیموکراتی کوردستان ب تایبەتی، ب ڕێز و شکۆیەکا مەزن ڤە پێشوازیێ ل یۆبیلا زێرین و (50) مین سالڤەگەڕا هەڵگیرسانا شۆڕشا 26ێ گولانێ دکەن.
ئەو شۆڕشا، وەکو چریسکەکا گەش د سەخترین و دژوارترین قۆناغێن سیاسی یێن بزاڤا ڕزگاریخوازیا گەلێ کوردستانێ دا هەڵبووی، پیلانێن دوژمن و داگیرکەرێن کوردستانێ سەروبن کرن و جارەکا دی تۆڤێ باوەریێ و ئومێدێ د ناخ و دەرۆنێ گەلێ کوردستانێ دا چاندیەڤە.
دۆژمن و داگیرکەرێن کوردستانێ، پشتی پیلانگێڕیا شۆما جەزائیر ل 6ێ ئادارا 1975ێ، هزردکر کو دۆزا کوردی ب تەمامی ژ ناڤچوو و ئیرادەیا گەلێ مە، بۆ هەتا هەتایێ هاتە شکاندن و د وێ باوەریێ دا بوون، هەر وەکو چەوا د پەیامێن خۆ یێن فەرمی دا ئاماژە پێدای: (لقد انتهی الجیب العمیل وإلى الأبد) کو جارەکا دی چ شۆڕشێن کوردی سەرهەلنادنەڤە، لێ هەڵگیرسانا شۆڕشا گولانێ، ل ژێر وێ گۆشەگیریا دژوارا دوژمنان، ب سەر گەلێ کوردستانێ، پارتی دیموکراتی کوردستان و سەرکردایەتیا وێ دا سەپاندی، پەیامەکا بهێزا سیاسی و سایکۆلۆژی یا هەمەلایەن بوو.
ژ لایەکێ ڤە شۆڕشا گولانێ وەک ڕوودانەکا گرنگ و وەرچەرخانەیەکا مێژوویی، ڕۆڵ و سەنگا بزاڤا ڕزگاریخوازیا گەلێ کوردستانێ بۆ قۆناغەکا سیاسی یا پێشکەفتیتر ڤەگوهاست، ب ئاوایەکی کو د گۆڕەپانا سیاسی یا ناڤخۆیی و جیهانی دا، ئەو بزاڤا شۆڕشگێڕی وەک هێزەکا کارتێکەر و خودان بڕیار، ڕۆڵێ خۆ یێ ژ هەژی گێڕا و هەڤکێشەیێن سیاسی ل سەر ئاستێ هەرێمی و نیڤدەوڵەتی گۆهڕین و زەنگا هشیاربوونا فەلسەفەیا بەردەوامیێ د ڕوویێ جیهانێ دا ڕاگەهاند، کو دۆزا گەلێ کوردستانێ دۆزەکا زیندی و ڕەوایە و ب چ سازش، پیلانێن هەرێمی و نیڤدەوڵەتی و ڕێکەفتنێن ژێربەژێر ژ ناڤ ناچیت.
ژلایەکێ دی ڤە شۆڕشا 26ێ گولانێ، وەک درێژەپێدەرا شۆڕشا مەزنا ئەیلوولێ، دەنگڤەدانەکا مەزن د ناڤ جەماوەرێ باژێڕ و باژێڕۆکێن کوردستانێ دا پەیداکر.
دەمێ حکومەتا عێراقێ یا وی سەردەمی د چارەسەرکرنا کێشەیا کوردی دا پاشگەزبووی، وێ شۆڕەشێ ڕەوایەتی دا خەباتا شۆڕشگێڕی و جەماوەری، بۆ ب دەستڤەئینانا مافێن ڕەوایێن گەلێ مە. شکۆ و کەرامەتا نەتەوەیی ژ شکەستنێ پاراست و نائۆمێدی د دلێ تاکی کورد دا گۆهۆڕی بۆ باوەربەخۆبوون، خۆڕاگری و ڕووبەڕووبوونا ستەم و زۆرداریا دوژمنان.
شۆڕشا 26ێ گولانێ ب ڕێبەریا بابێ ڕۆحی یێ نەتەوا کورد بارزانیێ نەمر، و ب پشتبەستن ب ئیرادەیا پۆڵایین یا گەلێ کوردستانێ، گیانفیداییا پێشمەرگێن قەهرەمان و ڕێکخستنێن ناڤخۆیی د ناڤ جەرگێ دوژمنی دا، چریسکەکا نوو یا هیڤی و بەرخۆدانێ و هێڤێنێ ئازادیێ ل سەر کۆپیتکا چیایێن بلندێن کوردستانێ هەڵکر.
شۆڕشا 26ێ گولانێ، بتنێ ڕووبڕووبوونەکا سەربازی نەبوو، بەڵکو قوتابخانەیەکا هزری، فەلسەفی و پەروەردەیا نیشتیمانی و نەتەوەیی بوو، واتایا قوربانیدانێ و باوەریا موکوم ب دادپەروەریا دۆزا ڕەوایا گەلێ کورد و سەرکەفتن، د ناخێ گەلێ کوردستانێ دا چاند. د ڤێ ڕێیا ئاسێ و پڕی ئاستەنگ دا، گەلێ کوردستانێ ڕووبەڕوویێ دڕندەترین شێوازێن قڕکرن و جینۆسایدێ بوو.
دوژمنی هەمی سنوورێن مرۆڤایەتیێ بەزاندن ژ بۆ تێکدانا دیموگرافیا کوردستانێ و هشککرنا ژێدەرێن شۆڕشێ و ژیانێ، ب هزاران گوندێن کوردستانێ سۆتن و وێرانکرن، گەلێ مە ل ئۆردوگایێن زۆرەملێ دوورپێچکرن، و بۆ سەرکوتکرنا خەباتا شۆڕشگێڕی، ڕێکەفتنێن شەرمەزاریێ دگەل دەولەتێن داگیرکەر ئیمزا کرن.
تاوانا هۆڤانە یا بێسەروشوێنکرنا 8000 بارزانییان، جینۆسایدا 12000 کوردێن فەیلی و دەرێخستنا ب سەدان هزارێن دی، و ل دووماهیێ ژی پڕۆسەیێن ڕەش یێن ئەنفاڵان و کیمیابارانکرنا هەڵەبجە، بەهدینان و دەڤەرێن دی یێن کوردستانێ، وەک خالەکا ڕەش د دیرۆکا عێراقێ و وژدانا مرۆڤایەتیێ دا تۆمارکرن.
لێ د ئەنجام دا هێزا باوەریێ، ئیرادەیا پۆڵایین یا گەلێ کوردستانێ و فیداکارییا پێشمەرگەیێن قارەمان و هێزا بەرگری مللی، سەرکەفت و بەربەستێن فاشیزمێ هاتنە تێکشکاندن. کانیێن وێ خوینا پاقژا د قۆناغێن جودا یێن شۆڕشێن ئەیلۆل و گولان دا پەنگییاین، د بهارا سالا 1991ێ دا پەقین و بوونە هێڤێنێ سەرهەڵدانەکا مەزنا جەماوەری، کو د ئەنجامدا کوردستان ب کەرکووکا دلێ کوردستانێ ڤە ئازاد بوو.
گەلێ کوردستانێ ب دەستپێشخەریا جەنابێ سەرۆك مەسعود بارزانی و د وەرچەرخانەیاکا مێژوویی دا، ژ قۆناغا شەرعیەتا شۆڕشگێڕی، پێنگاڤ بەرەڤ شەرعیەتا دیموکراسی و دەستووری هاڤێتن. بۆ جارائێکێ ل 19ێ گولانا 1992ێ هەڵبژارتنێن سەرتاسەری ل کوردستانێ بڕێڤەچوون و بناغەیەکێ موکوم بۆ قەوارەیێ سیاسی و دەستووری یێ هەرێما کوردستانێ و دامەزراوەیێن وێ یێن شەرعی هاتەدانان، کو ئەڤرۆکە گەلێ کوردستانێ ب ئازادی و سەرفەرازی ل ژێر سیبەرا وی دەستکەفتیێ مەزن و دیرۆکی دا دژیت.
د ڤێ هەڵکەفتا نیشتیمانیا مەزن دا، ئەم ب شانازی و ئەمەکداری ڤە ڕۆڵێ دیرۆکی و سەرکردایەتیا حەکیمانە یا سەرۆک مەسعود بارزانی، ئەندازیارێ ئاشتیێ و شەهیدێ هەردەم ساخ کاك ئیدریس بارزانی و سەرجەم هەڤاڵێن وان یێن خەباتکار د شۆڕشا گولانێ دا، یێن کو بەردەوامی ب ڕێڕەوا شۆڕشێ داین و خەتیرا ئازادیێ گەش هێلای ب بیردئینین.
دەمێ ئەم ل مەکتەبا ڕێکخستنا پارتی دیموکراتی کوردستان ل بەهدینان ڤێ یاد و بیرەوەریا مەزن ساخدکەین، د هەمان دەم دا تەکەزێ دکەین ل سەر ئێکڕێزیا ناڤماڵا کوردستانی، پاراستنا دەستکەفتیێن گەلێ مە، بلندکرنا گیانێ بەرپرسیارەتیێ، پاراستنا مافێن دەستووری یێن هەرێما کوردستانێ، و ڕووبڕووبوونا وان هەمی کەمپینێن چەواشەکاریێ، یێن کو قەوارێ هەرێما کوردستانێ و دەستکەفتێن گەلێ مە دکەنە ئارمانج.
سڵاڤ ل پێشمەرگێن قارەمانێن شۆڕشا 26ێ گولانێ و مالباتێن وان یێن سەربەرز.
سلاڤ ل هێزا خۆڕاگرا بەرگری ملی.
سلاڤ ل خەبات وبەرخودانا ڕێکخستیێن ناڤخۆیی و زیندانیێن سیاسی، سلاڤ ل وان دایك و خویشکێن همبێزا خۆ بۆ پێشمەرگەی و شۆڕشی ڤەکری.
سلاڤ ل گیانێ پاکێ شەهیدێن شۆڕشا گولانێ و تەڤایا شەهیدێن ڕێیا ڕزگاریخوازیا گەلێ کوردستانێ، و سەر کاروانێ شەهیدان بارزانیێ نەمر و کاك ئیدریسێ هەردەم ساخ.
بژیت کورد و کوردستانکوردستان هەرا ئارام و ئاڤەدان بیت.
مەکتەبا ڕێکخستنا پارتی دیموکراتی کوردستان ل بەهدینان
26ێ گولانا 2026ێ See less
