ئەڤرۆ ئەم ب دڵەکێ تژی ئێش و خەم، 41مین سالیادا کارەساتا دلتەزینا بۆمبەبارانکرنا ئۆردیگایێ “زێوە” ب بیر دئینین.
ئەو تاوانا هوڤانە یا کو ڕژێما دیکتاتۆرییا ژناڤچوویی ل 9ێ خزیرانا سالا 1985ێ، پەنابەرێن سڤیل و بێگونەهێن ئۆردیگایێ زێوە ل ڕۆژهەلاتێ کوردستانێ کرینە ئارمانجا ئاگر و بۆمبەیێن فڕۆکەیێن خۆ، و د ئەنجامدا 150 وەلاتیێن سڤیل و بێدەسھەڵات شەھیدبوون و پتر ژ 400 کەسان ژی برینداربوون.
بۆمبەبارنکرنا ئۆردیگایێ زێوە یێ پەنابەران، ئێک ژ وان زنجیرە تاوانێن ھۆڤانەبوو یێن ڕژێما بەعسا ژناڤچوویی، کو ب درێژاھیا ساڵێن دەسھەڵاتداریا خۆ ل دژی گەلێ مە ئەنجامداین.
گونەها وان قوربانیان بتنێ ئەو بوو، کو ئەو کوردبوون و ژیوارێ شکەستن و بندەستیێ، یێ پشتی ساڵا 1975 ل سەر گەلێ کورد ھاتیە سەپاندن رەتکربوو، و ژیانەکا سادەیا نەداریێ و دەربەدەریێ پێخەمەت ئازادیێ و پاشەڕۆژەکا گەش ھەڵبژارتبوو.
دەمێ ئەم ل مەکتەبا ڕێکخستنا پارتی دیموکراتی کوردستان ل بەهدینان، ب ڕێز و شکۆڤە قوربانیێن ڤێ کارەساتا مەزن ب بیردئینین، د ھەمان دەم دا تەکەزیێ دکەین کو ئەڤ تاوانە دێ وەک شاهدەکێ زیندی ل سەر مەزنیا وان نەهامەتیێن ب سەرێ گەلێ مە هاتین مینیت، و دێ د دیرۆکا گەلێ مە دا د بیردانكا نیشتیمانپەروەران و بەرەبابێن داهاتی دا ھێتە پاراستن.
سەرەڕای ستەم، زۆرداری، ئەنفال، کیمیاباران و سیاسەتێن قڕکرنێ و پاکتاوا ڕەگەزی یا ڕژێمێن ئێک ل دووف ئێکێن عێراقێ، گەلێ کوردستانێ مینا چیایێن خۆ یێن خوڕستی، ل ھەمبەر ھەمی باھۆزان خۆڕاگر ما و ب ئازادیا خۆ شادبوو. لەوما د ڤێ بیرەوەریا خەمگێن دا، ب دەرفەت دزانین کو داخوازێ ژ حکومەت و تەڤایا ھێزێن سیاسی یێن عێراقی بکەین، پەند و سەربۆڕان ژ دیرۆکێ وەرگرن و دەست ژ ئاڵاڤ و سیاسەتێن سەرکوتکرنێ و برسیکرنا گەلێ کوردستانێ بەردەن، و ڕێکارێن ئاشتیێ و دیموکراسیێ بۆ چارەسەرکرنا کێشەیێن ھەڵاویستی بگرنە بەر، چونکە دیرۆکێ سەلماندیە کو گەلێ کورد چەماندن و خۆڕادەستکرنێ نزانیت.
د 41مین سالیادا تاوانا بۆمبەبارانکرنا ئۆردیگایێ زێوەدا، سۆز و پەیمانان بۆ بابێ ڕۆحیێ نەتەوا کورد بارزانیێ نەمر نوو دکەینەڤە، کو ل سەر ڕێبازا وی یا پیرۆز بەردەوامبین و درێژیێ ب کاروانێ خەبات و تێکۆشینێ بدەین، ھەتا ب دەستڤەئینانا دوماھی خەون و ئارمانجێن گەلێ مە.
ل دوماھیێ، بلندترین ڕێز و پێزانینان پێشکێشی مالباتێن سەربلندێن شەهید و بریندارێن ڤێ تاوانا مەزن دکەین و تەکەزیێ دکەین کو خوینا شەهیدێن مە دێ ھەردەم ئەو چرا بیت، یێ ڕێیا خەباتا ڕزگاریخوازییا گەلێ مە ڕووندکەت.
نەمری و سەربلندی بۆ شەهیدێن بومبەبارانا ھۆڤانە یا ئۆردیگایێ زێوە و هەمی شەهیدێن ڕێیا ڕزگاریا گەلێ کوردستانێ و سەرکاروانێ شەھیدان بارزانیێ نەمر و کاک ئیدریسێ ھەردەم ساخ.
بەرەف پاشەڕۆژەکا گەش و کوردستانەکا ئارام و ئاڤەدان.
مەکتەبا ڕێکخستنا پارتی دیموکراتی کوردستان ل بەهدینان
9ێ خزیرانا 2026ێ
