ل ڕۆژەکا وەکی ئەڤڕۆ، بەریا ۱۰۲ ساڵان، پەیماننامەیا لۆزان هاتە ئیمزاکرن کو بوو خالا وەرچرخانەکا یەکجار مەزن د مێژوویا ڕۆژهەڵاتا ناڤەڕاست، و ئیەک ژ کاریگەرترین ڕێکەفتنان بوو ل سەر چارنڤیسێ مللەتێ کورد.

پشتی کو پەیماننامەیا سیڤەر ل ساڵا ۱۹۲۰ دەرگەهەکێ هیڤیێ بۆ گەلێ کورد ڤەکری دا کو بڕیارێ ل سەر چارەنفیسێ خۆ بدەت ، لۆزان هات دا کو وی دەرگەهی بگریت و دابەشکرنا کوردستانێ ل سەر چەند وەڵاتان بکەتە کەتوارەکێ تال. ب ڤێ یەکێ ژی قۆناغەکا درێژ یا ئێش، دەرد، و بێبەشبوونێ ژ بنەڕەتیترین مافێن نەتەوەیی و مرۆڤایەتی دەستپێکر.

لۆزان ب تنێ ڕێکەفتنەک نەبوو بۆ دیارکرنا سنووران، بەڵکو دەستپێکا سەدەیەکی پڕ بوو ژ ئالنگاری و ئاستەنگان ل هەمبەر مللەتێ کورد. لێ کوردان ب ڕێیا شۆڕش، ڕاپەڕین و بزاڤێن سیاسی بەردەوامی دا خەباتا خۆ بۆ بەرهنگاربوون و پاراستنا ناسنامە و مافێ خۆ یێ ڕەوا پێخەمەت ئازادی و سەربلندیێ.
سەرەڕای دەربازبوونا زێدەتر ژ سەدەیەکێ، گەلێ کورد سەلماند کەس نەشێت ب پەیماننامەیان ئاریشا وان ژ ناڤ ببەت، و نە ژی سنوورێن بەڕژەوەندیێن نیڤدەولەتی دیارکرین دشێن پرسا وان ژ بیر ببەن. پرسا کوردی تا نوکە یا ساخە و هێزا خۆ ژ ڕەوابوونا دۆزا خۆ و ژ قوربانیێن نفش ل دووڤ نفشێن خۆ وەرگرتیە.

بیرئینانا پەیماننامەیا لۆزان ب تنێ ژ بۆ بیرئینانا ئێش و ژانێن بووری نینە، بەڵکو بانگەوازەکا نوویە بۆ جڤاکێ نیڤدەولەتی دا کو پێداچوونێ د ئێک ژ ڕەواترین پرسێن نەتەوەیی ل دەڤەرا مە دا بکەت، و کار بکەت بۆ پشتەڤانیکرنا چارەسەریەکا دادپەروەرانە و بەردەوام کو مافێن ڕەوا یێن مللەتێ کورد مسۆگەر بکەت، ب گۆرەی بنەمایێن دادپەروەریێ و مافێ گەلان د بڕیارا چارەنڤیسێ خۆ دا.
لۆزانێ جوگرافیا بەست… بەلێ نەشیا ئیرادەیا مللەتەکێ باوەری ب ئازادیێ ھەی بشکێنیت