ئەڤرۆ 33 ساڵ ب سەر کارەساتا دلتەزینا کیمیابارانا باژێرێ حەلەبچەیا شەهید دا دەرباز دبن، ئەڤ تاوانا هوڤانە یا کو ژ لایێ ڕژێما بەعسا ژناڤچووی ڤە ل 16ێ ئادارا 1988ێ هاتیە ئەنجامدان، پشکەک بوو ژ زنجیرەیەکا تاوانێن مەزن و ب ئێک ژ دڕەندەترین تاوانێن دیرووکا مرۆڤایەتیێ یا هەڤچەرخ دهێتە هەژمارتن، کو دچەند خولەکێن کێم دا ھەناسەیا ب هزاران خەلکێ سڤیل و بێ دەستھەڵاتێ حەلەبچە ب چەکێ کیمیاویێ قەدەغەکری ھاتە چککر.
جادە و کۆڵانێن هەڵەبچە ژ لەشێن بێ گوننەھێن ژن و زاڕۆکان پڕببوون، ب ڕەنگەکێ گەلەک تراژیدی، کو وژدانا ھەمی مرۆڤایەتیێ ھەژاند. حەلەبچە دەنگێ وژدانا بریندار و قیژیا بێ گوننەھیا گەلێ کوردە، وێنە و دیمەنێن وێ کارەساتا مرۆڤی، ئەوا ڕژێما بەعس ل ڕۆژا ڕۆن ل پێش چاڤێن جڤاکێ نیڤدەولەتی ئەنجامدای، دێ ھەتا ھەتایێ مینا شاھدەکێ زیندی، ل سەر ستەم و زۆرداریا ڕژێما بەعسا گۆڕبەگۆڕ د بیردانک و دناڤ لاپەڕێن دیرووکا گەلێ مە و ھەمی مرۆڤایەتیێ دا مینیت.
ئەم وەک مەکتەبا ڕێکخستنا پارتی دیموکراتی کوردستان ل پارێزگەها دهۆکێ، ب دڵەکێ پڕ ژ ئازار، قوربانیدانێن گەلێ خۆ یێن ڤێ چاما مەزن ب ڕێز و شانازیڤە ب بیر دئینین و دوپات دکەینەڤە کو خوینا وان یا پیرۆز، وەکو مەشخەلەکێ ھەمێشە ھەل، دێ ڕێکا ئازادی و کەرامەتێ بۆ مللەتێ مە ڕۆھنکەت.
کارەساتا حەلەبچە لاپەرەکێ ڕەشە د مێژوویا ڕژێما بەعسا دکتاتۆر دا و شەرمەزاریەکا مەزنە بۆ جڤاکێ نیڤدەولەتیێ ل سەر ڤێ تاوانێ بێدەنگ مای، لێ ژ لایەکێ دی ڤە ھێز و ئیرادەیا گەلێ مە بوو، بۆ بەردەوامیبوون ل سەر خەباتا خۆ یا ڕەوا و ب دەستڤەئینانا مافێن خۆ یێن نەتەوەیی و چەسپاندنا بەهایێن ئازادی، دادپەروەری و دیموکراسیێ.
د ڤێ هەلکەفتنا خەمگین دا، داخوازێ ژ حکومەتا عێراقا فدرال دکەین، کو ب بەرپرسیاریەتیا خۆ یا یاسایی، ئەخلاقی و مێژوویی، بەرامبەر قوربانیێن ڤێ تاوانا ھۆڤانە ڕابیت، ئەو ژی ب ڕێکا قەرەبووکرنا دادپەروەرانە یا کەسوکارێن شەهیدان و برینداران ژ لایێ مرۆڤی، تەندروستی و ماددی ڤە. هەروەسا داکۆکیێ ل سەر پێشکێشکرنا باشترین خزمەتگۆزاریێن پزیشکی و چاڤدێریا جڤاکی بۆ ڕزگاربوویێن ڤێ کارەساتێ دکەین، کو هەتا ئەڤرۆ ژی گەلەک ژ وان، ژ ئێش و ئازارێن وێ تاوانێ دنالن.
هەروەسا جەختێ ل سەر بەردەوامییا هەوڵێن یاسایی و سیاسی دکەین بۆ ناساندنا تاوانا حەلەبچە، وەک تاوانەکەکا قڕکرنێ “جینۆساید” ل سەر ئاستێ نێڤدەولەتی، داکو مافێن قوربانیان بهێنە پاراستن و ڕێگری ل دووبارەبوونا تاوانێن وەسا ل دژی ھەمی گەلێن جیهانێ بھێنەگرتن.
داخوازێ ژ جڤاکێ نیڤدەولەتی و ڕێکخراوێن مرۆڤدۆست دکەین کو بەردەوام بن د پشتەڤانیکرنا حەڵەبچە دا و داکۆکیێ ل سەر قەدەغەکرنا چەکێ کیمیاوی ل هەمی جیهانێ دکەن.
وەفادارییا مە بۆ خوینا شەهیدێن حەلەبچە، ئەرکەکێ پیرۆز دئێخیتە سەر ملێن مە هەمیان، کو یەکڕێزییا ناڤماڵا کوردی و دەستکەفتێن ب خوینا شەھید و پێشمەرگێن قارەمان هاتینە دەستڤەئینان بپارێزین.
ل دوماھیێ د ڤێ یادا پڕ ب ئێش دا، سەرێ ڕێز و نەوازشێ بۆ شەهیدێن حەلەبچە و تەڤایا شەھیدێن بزاڤا ڕزگاریخوازیا گەلێ کوردستانێ و سەر کاروانێ شەھیدان بارزانیێ نەمر و کاک ئیدریسێ ھەردەم ساخ دچەمینین.
سەرفەرازی بۆ شەھیدێن بێ گوننەھێن ھەلەبچە و تەڤایا شەھیدێن کوردستانێ. ڕووڕەشی و شەرمەزاری بۆ ئەنجامدەرێن تاوانا کیمیابارانا ھەلەبچە.
بەرز و بلندبیت ئالایێ کوردستانێ و کوردستان ھەرا ئارام و ئاڤەدان بیت.
مەکتەبا ڕێکخستنا پارتی دیموکراتی کوردستان پارێزگەها دهۆکێ
