نڤێسین: دکتۆر نایف کوردستانی
ئەو خەونا کو هندەک کەسێن شکستخواری، لادەر، تێکدەر، دووڕوو، بەرژەوەندیخواز و نۆکەرێن ئەجێندایێن دەرەکی دبینن؛ ئەوێن ل سەر جادەیێن ئەورۆپا و ئەمریکا و ئۆسترالیا بێ ئارمانج دگەرن و خۆ هاڤێتینە د ھەمبێزا بیانییان دا، داکو ژ وێرێ هێرش بکەنە سەر هەرێما کوردستانێ و درووشمێ (مالئاڤا هەرێما کوردستانێ) بلند بکەن.
ئەز دبێژمە خودانێن وان سالۆخەتان
ئێک: هەرێما کوردستانێ بەرهەمێ ڕاپەڕینەکا جەماوەری یا مەزنە بۆ ڕزگاربوون ژ ڕژێما بەعسا ژناڤچووی ل سالا (1991) و دەرئێخستنا دام و دەزگەھێن وێ ڕژێما خوینمێژ ژ ئاخا پیرۆزا کوردستانێ.
دوو: قەوارەیێ هەرێما کوردستانێ د دەستوورێ عێراقێ یێ هەمیشەیی دا یێ دانپێدایە.
ل دویف ماددەیێ (117) بڕگەیا ئێکێ:
ئەڤ دەستوورە ل دەمێ کارپێکرنێ دا، دانپێدانێ ب هەرێما کوردستانێ و دەسهەلاتێن وێ یێن نوکە وەک هەرێمەکا فیدرال دکەت.
سێ: ژناڤبرنا هەرێما کوردستانێ تنێ خەونەکا مەحالە. لەوما گەلەک خەونێن بێ بنەما نەبینن، چونکو ئەڤە تنێ ئاشۆپ و بێ مفانە، تنێ تێکدانا مێشکی یە کو چ پەیوەندی ب ڕاستیێ ڤە نینە.
چار: هەرێما کوردستانێ بەرھەمێ زنجیرەیەکا قوربانیێن گران و ڕوندکێن دایکێن شەهیدان و خەباتا گەلێ کوردستانێ یە، ئەڤە نە بتنێ بڕیارەکا حزبی بوو، بەلکو کۆدەنگی و ئیرادەیا هەمی پێکهاتە و تەخ و چینێن گەلێ کوردستانێ بوو.
پێنج: هەرێما کوردستانێ ژ لایێ سیاسی ڤە وەک (دەولەتا ئەمری واقیع) دهێتە هەژمارتن؛ ژبەر هەبوونا پەرلەمانەکێ هەلبژارتی و حکومەتەکا شەرعی، زێدەباری سەرکەفتنێن وێ یێن سیاسی، ئەمنی و ئابووری.
هەرێم بوویە فاکتەرەکێ سەرەکی یێ سەقامگیریێ ل ڕۆژهەلاتا ناڤین، ب شێوەیەکێ کو هەولێرا پایتەخت بوویە ناڤەندەکا بڕیارا سیاسی و کارەکتەرەکێ سەرەکی د کێشە و هەڤکێشەیێن دەڤەرێ دا.
هوون ئەوێن کەرب و کینێ چاڤێن هەوە کورە کرین، خەونێن هەوە ب دوماهی ئینانا ڤی قەوارەێ تنێ دەنگە دەنگەکێ بێ مفا و بێ ئەنجامە د ناڤ گۆڕەپانا راستیێ دا.
هەرێما کوردستانێ چیرۆکا سەرکەفتنەکێ یە کو ب دەستێن کچ و کورێن وێ یێن دلسۆز هاتیە نڤێسین، بێگۆمان ئەڤ سەرکەفتنە دبیتە ئەگەرێ بێزاربوونا نەیار و دوژمنێن کوردستانێ.
من نەدڤیا ب زمانەکێ زڤر بنڤیسم، لێ ژبەر کو هندەک کەس د تۆڕێن جڤاکی دا زمانەکێ نزم بکاردئینن، پێدڤی بوو ب زمانەکێ توند بەرسڤا وان بهێتە دان داکو سنوورێ خۆ بزانن.
من باوەریەکا تمام ب وێ گۆتنێ نینە، یا کو دبێژیت: “سە دڕەون و کاروان ب ڕێیا خۆ دچیت” بەلکو ئەز دبێژم: پێدڤی یە کاروان ڕاوەستیت و وان سەیێن بەرەڵا یێن کو دبنە ڕێگر ل بەر پێشڤەچوونێ، سنورەکێ بۆ دانن.
بەڵێ بەرەف قۆناغەکا نوو و ئاڤاکرنا کۆنفیدرالییا کوردستانێ و پاشی دەولەتا سەربەخۆیا کوردستانێ
بژیت کوردستان
بژیت سەرکردایەتییا مەیا حەکیم
وەرگێڕان ژ زمانێ عەرەبی
ئیدریس ئیسماعیل تروانشی
