​نڤێسین: ئازاد بەرواری

زڤستانەکا گەلەك بەفرین بوو، ئەم ل گەلیێ سێدەرا بووین، ل بنارێ چیایێ گارەی، سەرۆکایەتی هاتبوو دەڤەرا لقا ئێك و بارەگایێ خۆ دانابوو گوندێن دەڤەرا نێروە و ڕێکان، سوپایێ عیراقێ ب پشتەڤانیا شەش کەتیبێن توپێن 175 ملم یێ نەمساوی و ب فڕوکەیێن جەنگی و هلیکۆپتەران و هێزەکا پیادە یا پێکهاتی ل هزاران جەحشێن هوزێن کوردی یێن ل ئالیێ سوپایێ عیراقێ چەپەر گرتبوون دژی پێشمەرگە و بەرگری میللیێ کوردستانێ.

بڕیار هاتە دان ژ لایێ کارگێڕیا لێژنا دەڤەرا ئاکرێ و شێخان کو ئەم ژ بارەگایێن خۆ دەرکەڤین و بەرەڤ چیایێ گارە بچین بۆ گەرەنتیکرنا پەیوەندیێن بێتەلی و پاراستنا نهێنیێن لژنێ. ئەز وەکی بەرپرسێ بەشێ بێتەلیا دەڤەرا ئاکرێ و شێخان ل گەلیێ سێدەرا دەرباز بوم بۆ جهەکێ ئاسێ تر، شەڕ دەست پێکر، توپێن 175 ملم بەردەوام گەلیێ سێدەرا بۆمبەباران دکرن، فڕوکەیێن جەنگی ل هنداڤی گەلیێ سێدەرا چاڤدێریا لڤین و کۆمبوونێن پێشمەرگان دکر و بەردەوام بۆمبەباران دکرن.

ئەم نەچار بووین ب کێماتی، ڕوژێ جارەکێ هەتا دوو جاران دەزگایێ بێتەل ژ خالەکێ بۆ خالەکا نەپەنی تر ڤەگوهێزین، ژ بەر بەردەوامیا پەیوەندیێن مەیێن بێتەلی و فریکوانسێن لاسلکی، فڕوکەیێن جەنگی جهێ مە دەستنیشان دکرن و بۆمبەباراندکرن و ئیحداثیات ددانە کەتیبێن توپێن 175 ملم، وان ژی ژدویر ڤە، ل ئەترویش ب چڕی دەڤەرێن گارەی و بارەگایێن مە بۆمبەباران دکرن.

ل ناڤبەرا ساڵا 1983 و هەتا ئەنفالێن بەهدینان ل 25/8/1988 ێ سوپایێ عێراقێ گەلەك جاران هێرش دکرە سەر دەڤەرێن زاخو، دهۆك، گولان و هێرشا هەری سەخت و دومکێش و چڕ کو دووقۆناغی بوو، ل زڤستانا هەیڤا دوازدە ل ڕوژا 1986⁄12⁄14ێ هەتا دوو هەفتێن ئێکێ ل مەها 1/1987 ێ ل سەر دەڤەرا ئاکرێ و شێخان بەردەوام بوو، مە وەك بەشێ بێتەلی هەوڵ دا کو ڕۆژانە ب کێماتی ١18 هەتا 20 دەمژمێران بەردەوام د پەیوەندی دابین ل گەل سەرۆکایەتی کو ل دەڤەرا نێروەییا بوون. سەرۆکایەتی سەرپەرشتیا لڤینێن شەڕی دکر و سەرپەرشتیا پشتەڤانیا پێشمەرگەی دکر ب گەهاندنا ئازۆقە و چەکێ گران، ل دەڤەرێن دهۆك ئامێدی و زاخۆ پێشمەرگە و چەکێ گران و توپا 120 ملم یا شوڕەشێ گەهشتە دەڤەرا بەرواری ژێریا، ژبەر کو شەڕێن هەری مەزن ل دورێن بارەگایێ سێدەرا گەلیێ کانیمازێ کو سرتەکا ب کاژ یا لێبوو، ل وارا پێشمەرگە وەك قەهرەمانان ل وێ زڤستانێ و بەفر و سڕ و سەقەمێ ل بەر خوە ددان ل دژی هێرشێن جاشا و ب پشتەڤانیا فڕوکان و توپ و تانکان.

مە وەك بەشێ بێتەلیێ زانیاریێن بەردەوام هەمی سەرێن سەعەتان دگەهاندنە سەرۆکایەتی، ل ڤێرێ هەژی گوتنێ یە کو ببێژم شەهید سەید حوسێن ئامێدی، وێ چاخی ل گەل من بێتەل بوو و مە پێکڤە سەرپەرشتیا دەزگایێ بێتەلیێ دکر، ڕاستی شەهید سەید حوسێن توانایەکا بێ سنوور هەبوو، پشـتەڤانەکێ موکوم بوو، ب هەبوونا وی ئەم شیاین پەیوەندیا بەردەوام ل وان دەلیڤێن سەخت دا ل گەل سەروۆکایەتی مسوگەر بکەین.

ل قۆناغا دووێ یا هێرشێن سوپایێ عێراق ب پشتەڤانیا جاشان، گەهشتنە نێزیکی بارەگایێن مە ل سێدەرا، لەوما ب هاریکاریا (مام ئیسحاق ئاتوشی) کو ل چیایێ گارە گەلەك شەھرەزا بوو، وی پێشنیار کر کو ئەم دەزگەیێ خۆ ببەینە شکەفتەکێ ل گارەی ب ناڤێ شکەفتا (پیرباڵ) دا کو بشێین بەردەوامی ب پەیوەندیێن بێتەلی ل گەل سەرکردایەتی بکەین. وی دەمی ل گارەی پتر ژ 3 مەترا بەفر کەتبوو، ژ بەر کو ئەم ژ ئاڤێ دوویر بوین، مە بەفر ل سەر ئاگری دحەلاند و ڤەدخار. ل وێرێ ژی بەردەوام توپ و گوللەیێن تانکا دهاتنە ئاراستە کرن بۆ جهێ مە، لێ جهێ مە گەلەك یا ئاسێ بوو.

پشتی کو هێرش ب دوماهیك هاتی ئەم شیاین ل 12/1/1987 ل گارەی بهێینە خوارێ و زڤڕینە ڤە بۆ بارەگایێن خۆ. پێشمەرگە و بەرپرسێن لیژنا ئاکرێ و شێخان گەلەك وەستیا بوون، هەمی چوونە بێهن ڤەدانێ. ل ئێڤاریا 29/1/1987 ێ ئەم ل بارەگایێ ئاکرێ و شێخان بووین، بەفرەکا زێدە کەتبوو.

سوپایێ عیراقێ ل سەرێ کانیکا ل دەڤەرا بەرواری ژێری ل کەلھا سەربازیا کانیکا بنەجهـببوو، ڕۆژانە بارەگایێن مە بۆمبەباران دکرن.
وێ ئێڤارێ کاک داخواز مەجید ئەتروشی وەك ئەندامێ لژنا ئاکرێ ل بارەگایێ ئاکرێ ل گەلیێ سێدەرا مابوو، ئێڤار بوو، هاتە ژوورا مە یا بێتەلیێ، دیت کو ئەز گەلەكێ مژیل بووم ب وەرگرتنا بروسکەیان، ژوورا من تاری بوو، ئەز نەگەهشتم فانۆسکا خۆ هەلکەم، کاك داخواز هات فانۆس هەلکر و گوتە من خێرە: من ژی گوتێ: مەکتەب سیاسی ئەم ئاگەهدار کرین کو نووکە دێ برووسکەیەکا ب لەز بۆ مە ب (مۆرس)ێ ڤڕێکەن نێزیکی 1200 هزار و دوو سەد پەیڤایە و سیمبو ۆلا ( – – – ) واتە ( تا تا تا ) ڕاگەهاند، ل زمانێ بێتەلیێ دهێتە واتا کو بروسکەیەکا گەلەك لەزگین و گرنگە.

ڕاستی ژبەر کو ڕۆژانە و بەردەوام پتر ل 16 هەتا 18 دەمژمێران مە کارێ بێتەلیێ دکر، مە بارا پتری خشتەیێ جفرەیا بێتەلیێ ژ بەر کربوو. من دەست ب وەرگرتنا بروسکێ کر، کاك داخوازی خشتەیێ جفرێ دانا بەر سینگێ خۆ و دڤیا هاریکاریا من بکەت بۆ ڤەکرنا وان رە مزێن ژمارەیی یێن کو من ب زمانێ بێتەلیێ ب (مۆڕس)ێ وەردگرتن، من بخۆ گەلەك ژ وان سیمبۆلان ڕاستەوخۆ تەجفیر دکرن، چونکی من باراپتری وان ژبەر کربوون، ژبەرکو کارێ مەیێ ڕوژانە بوو.

وێ ئێڤارێ تەزینکەك ب سەر لەشێ من داهات، کاك داخوازی هەست پێکر، گوتە من خێرە؟
من ژی گوتێ خودێ خێر کەت، لێ پەیڤ پەیڤ ب ڕێکا مۆرسێ ل گەل کاک داخواز ئەتروشی مە خەبەرێ وەفاتا سەرکردێ جوانەمەرگ کاك ئیدریس بارزانی تەجفیر کر.

ئێك ژ هەلویستێن گەلەك خەمگین و کاریگەر د ژیانا من یا پێشمەرگایەتیێ بوو.
لڤێرێ دێ بەژنا خو ل ھەمبەر هەمی شەهیدێن کورد و کوردستانێ و سەر کاروانێ شەهیدان بارزانیێ نەمر و کاك ئیدریسێ جوانەمەرگ دچەمینم.