نڤێسین: غەیاسەدین نەقشبەندی
هەڤالێ من یێ سوننی/ شیعە، ژ ئەڤرۆ پێدا نابێژم “هەڤالێ من یێ عێراقی”. چونکی هەوە ب مووشەکان نیشا مە دا کو “عێراقیبوون” سالۆخەتەکە ب مووشەکان دهێتە سەپاندن، نەک ب دایکبوونێ دهێتە بەخشین.
ژ راستا ھوین گەلەک سەیرن، ھوین بۆ “ئێکەتیا عێراقێ” دگریێن و بیانوویێن هەوە یێن بێ بنەما خلاس نابن، ل بن پەڕۆکێ وێ میلیشیاتێ یا کو ھەوە ناڤێ وێ کریە”بەرگری” ئەڤ وەڵاتە کرە مەیدانا پیس و تاوانباران، پاشان هەوە ب پشتا شکەستی ڤە ڕادەستی ئیرانێ کر. بەلێ حەیف ئەو ئیرانا ھەوە ب 8 سالان شەڕەکێ خویناوی ل دژی وێ کری و باشترین گەنجێن خۆ تێدا کرینە قوربانی و گیانێ سەدان هزار کەسان ژ دەست چووی، و ئەو ئیرانا بوویە ئەگەرێ ڕاستەوخۆ یا تاوانێن ئەنفال و جینۆسایدا کوردان.
هوین وێنەیێن ڕێبەرێ ئیرانێ ل سەر کەنالێن خۆ یێن ڕاگەهاندنێ بلند دکەن، خۆنیشاندانێن هەوە ل بەغداد دەردکەڤن و هاوار دکەن: “کلا کلا للعراق” ئەرێ ئەڤە چ وەڵاتە هوین دخوازن ئاڤا بکەن؟
یان هوین وەڵاتەکێ دخوازن کو ناڤێ وی “عێراق” بیت و پایتەختێ وی “تەهران”؟
هەردەم هەوە کورد تومەتبار دکرن کو “هەستا ژێیاتیێ بۆ عێراقێ نینە”.
بهێلن ئەز پیچەک بکەنم… چەوا مە ژێیاتی بۆ وەڵاتەکێ هەبیت کو حکۆمەتا وێ کوردان ب مووشەکان بوردومان بکەت؟ چەوا ئەڤین د دلەکێ دا شین ببیت کو بارووت و درۆن ب سەردا ببارن؟
هوین دخوازن کورد ب وی ڕەنگی عێراقی بیت یان ھەوە دڤێت باجان بدەت؟
د شەڕێن هەوە دا پشکدار بیت و دەمێ هوین باژێرێن وان وێران دکەن خۆ بێدەنگ بکەن؟ لێ ئەگەر ل سەر مافێن خۆ باخڤیت هوون دکەنە خائین!
هوین بەردەوام بیانوویان دئینن و دبێژن: دڤێت هەولێرێ بوردومان بکەین چونکی کونسۆلخانەیا ئەمریکا لێ هەیە، هوین دزانن ئەڤ بیانوویە هەر ژ سالا 2003ێ وەرە بۆ چەندین جارا مە بھیستیە؟ ئەڤ بیانوویە وەکو پارچە قوماشەکێ ڕزێیە هوین هەرجار دکەنە بەرخۆ.
ئەو پسیارا هەوە شەرمەزار دکەت ئەڤەیە: ئەرێ هوین و میلیشیاتێن هەوە شییاینە ڕۆژەکێ ئەمریکییان دەربکەن؟ هەلبەت نەخێر.
ئەگەر ئەڤ لوژێکێ هەوە یێ ڕاست بیت، ئەرێ ما مافێ کوردان ژی نینە بەغدا بوردومان بکەت چونکی بالوێزخانەیا ئیرانێ یا لێ؟ هەروەسا میلیشیاتێن ئیرانی جادەیێن وێ تژی کرینە و مەشخەلێن حسێن ب گازا ئیرانی دهێنە هەلکرن، ئەرێ ما ئەڤە نە هەمان لوژیکە؟ یان لوژیک دهێتە گوهۆڕین دەمێ دگەل بەرژەوەندیێن ئیرانێ تێکەل دبن؟
تنێ هوین وی دەمی کوردان ب “عێراقی” دخوازن، دەمێ پێدڤییا هەوە ب چەکی و هاریکاریێ هەبیت و هوین بخوازن تەرمێن کوشتیێن وان د گۆڕێن بکۆم دا ڤەشێرن. لێ دەما کورد بخوازن د ما لا خوەدا پاراستی بمینن ل وی دەمی هوون ب چاڤێ”زایۆنی” تەماشە دکەن.
عێراقا هەوە ب فەرمی دکەڤیت پشتی کو ژ لایێ ئەخلاقی ڤە کەتی و ئەو دەولەتا کوشتنا هاولاتیێن خۆ ب هەبوونا کونسولخانەیێ یان ئەگەرێ هەبوونا ئیسرائیلیان ڕەوا دکەت، دەولەتەکا خۆکوشتیە بەری مرنا وێ بهێتە ڕاگەهاندن.
باوەر بکەن، ئەگەر هەوە وەک ھەڤپشکێن ڕاستەقینە سەرەدەری دگەل کوردان کربا، دا بینن چەوا گیانێ خۆ پێشکێشی وەڵاتی دکر. بەلێ مخابن… هوین هاولاتیێن کورد ب پلە 3ێ دخوازن نەک ھەڤپشکێن وەڵاتی.
مە وەڵاتەکێ هەی ناڤێ وی کوردستانە… ئەو “عێراقا” هوین بۆ دگریێن هەوە ب دەستێن خۆ ل بن خۆلییا میلیشیاتان و درووشمێن “کلا کلا للعراق” یێ ڤەشارتی. ڤێجا خۆشیێ ژ وێ عێراقا مایی ببینن و ل ھەوە پیرۆز بیت، بزانن کو ب مووشەکان حەز و ڤییان نابنە ھەست و ژێیاتی ژی ب گەفان ناهێتە دزین.
ئەڤە کیژ عێراقە هوین دخوازن ئەوا ژ وێنەیێن ڕێبەرا تژی بووی؟ یان ئەوا هوین زاڕۆکێن وێ بوردومان دکەن و پاشی دپرسن: “بۆچی هوون حەز ژ مە ناکەن”؟!
