نڤێسین: ئاسۆ حاجی
د دیرۆکا هەمی مللەتان دا، دەمێ وەرچەرخانەیەک د شێوازێ حوکمڕانیێ و دیرۆکێ دا پەیدا دبیت، ئەو وەرچەرخانەیە گوهۆڕینان ب دویڤ خۆ دا دئینیت. گوهۆڕین ژی ب ساناهی و زووی ناهێنە قەبوولکرن، ب تایبەتی ژ لایێ وان کەس و لایەنێن هەست دکەن ئەو گوهۆڕینە دژی بەرژەوەندیێن وانن. ئەڤە د درێژاهیا دیرۆکا مرۆڤایەتیێ دا دووبارە بوویە، د چیرۆکێن پێغەمبەر و فەیلەسۆف و ڕێبەرێن جڤاکی و سیاسی دا، ب ڕۆنی ئەڤ بۆچوونە دیارە و هاتیە سەلماندن.
نوکە کو مەسرور بارزانی ژ لایێ هندەک کەس و لایەنان ڤە بوویە ئارمانجا گۆتارا سیاسی و میدیایی یا وان، دووبارەبوونا هەمان چیرۆک و ئەزموون و دیرۆکێ یە. ئەوان تەحەمولا وان گوهۆڕینان نینە یێن کو دەولەتدارییا مەسرور بارزانی دگەل خۆ ئینایین.
دگەل دەستبکاربوونا وی وەک سەرۆک وەزیران، ئەگەرێ گوهۆڕینان د شێوازێ حوکمڕانیێ و چەوانیا بڕێڤەبرنا وەلاتی، بوو مژارا خەلک و لایەنان. هەر ئێکی ژ دیدەگەهـ و تێگەهشتن و بەرژەوەندیێن خۆ پێشبینیێن خۆ ددانە دیارکرن و بۆچوونا خۆ ل سەر وێ چەندێ ئاڤادکر. هندەکان بەحسێ هاتنا حوکمڕانییەکا توند و نەرێنی دکر، و هندەکان ژی مزگینیا وەرچەرخانەیەکا ئەرێنی ددا. ئەو خالا هەڤپشک د ناڤبەرا هەردوو بۆچوونان دا، دەستپێکرنا قۆناغەکا نوو یا سیاسی و حوکمڕانیێ بوو ل کوردستانێ.
پشتی ڤان چەند سالان ئەڤە روون بوویە کو پێگەھێن حوکمڕانیێ ژ لایێ مەسرور بارزانی ڤە ل سەر بنەمایێ شەفافیەت و مۆجامەلەنەکرن و خاترنەگرتنێ دهێنە بڕێڤەبرن. ل شوونا وان بنەمایێن پێکڤە کارکرن و هەماهەنگیێ بۆ بجهئینانا خالێن کارنامەیا حکومەتێ ژ لایێ لایەنێن پێکئینەرێن کابینا نەهێ ڤە دهێنە پەیرەوکرن.
ئەوا نوکە روودەت، پاشگەزبوون و لادانا مەسرور بارزانی نینە ژ کارنامەیا حکومەتێ و وێ رێککەفتنا دگەل لایەنان هاتیەکرن، بەلکو لایەن و هەڤپشکەکێ سەرەکی یێ پێکئینەرێن حکومەتێ، ژ بەر شاش خواندنا هەڤکێشەیان و تێنەگەهشتنا وان ژ ڕێبازێ لادایە. ل شوونا کارکرنێ بۆ بجهئینانا کارنامەیا حکومەتێ، ڕێگریێ لێ دکەن و ئاستەنگان بۆ دروست دکەن. ل شوونا کو خۆ د ناڤ گۆتارا کوردستانی دا ڕێکبێخیتەڤە، ب تەمامى بوویە پشکەک ژ گۆتار و کارنامەیا هێزێن ئیقلیمی د دژایەتیکرنا کوردستانێ و دامەزراوێن وێ دا.
ڕاستکرنا هێلا خوارا حوکمڕانیێ و سەرژنوو پێناسەکرن و داڕشتنا چەمک و دەستەواژەیان، ب گۆرەی قۆناغا نوو یا سیاسی و گوهۆڕینێن ناڤخۆیی و ئیقلیمی و نیڤدەولەتی، پێدڤی ب دەم و ئیرادە و مکوڕبوونێ هەیە.
ئەڤە هەمی ئەو کەرستەنە یێن مەسرور بارزانی د ئاڤاکرنا گۆتار و قۆناغا نوو یا حوکمڕانیێ دا بکار دئینیت و دەستبەرداری وان نابیت. لەوما ئەوێن دژایەتیێ دکەن و گرەوی ل سەر شکاندنا بزاڤێن وی دکەن، دڤێت ژ جارەکێ پتر هزرا خۆ بکەن و تەماشای دیرۆکا پێشکەفتن و گەشەکرنا جڤاکێ مرۆڤایەتیێ بکەن، کو نەشێن چەرخێ دیرۆکێ بۆ پاش ڤە پاڵ بدەن و نەشێن بەرامبەر حەتمیەتا گوهۆڕینان ڕابوەستن. لەوما باشترە پەندی ژ ئەوان ئەزموونان وەربگرن، مل بۆ حەق و حەقیقەتێ خارکەن و ببنە پشکەک ژ وان گوهۆڕینێن کو مفا و چاکیا گشتی تێدا هەی و کوردستانێ د هەمی بواران دا دبەتە قۆناغەکا پێشکەفتی تر و بهێزتر.
ئارمانجگرتنا مەسرور بارزانی و بزاڤێن شکاندنا وی، دووبارەکرنا دیرۆکەکا پتر ژ شەست سالی یە و دەستپێک و ژێدەرێ وێ دیارە و کارەکتەرێن وێ ژی دیار و نیاسینە. ئەڤە ژی دیارە پشتی وێ دیرۆکێ گەهشتینە چ و چ دەستکەفت هەبووینە، ژ پەشیمانیێ و دەستێن خۆ لەقدان و تل شکاندن پتر چ بەرهەم نەبوویە. ئەوێن نوکە ژی کو بەردەوامیێ ددەنە هەمان عەقلیەت دێ ب هەمان ئەنجام دەرکەڤن. لەوما ئەو کەس عاقلترن یێن کو دوو جاران ژ هەمان کونێ مار پێڤە نەدایی و وھوورتر و واقیعیانەتر سەرەدەریێ دگەل رووداو و پێشهاتان دکەن.
