ژ بەر کو پێنگاڤا ئێکێ یا دەستپێکا شوڕشا گولانێ ژ گوندێن سەر سنووری یێن باکوورێ کوردستانێ دەستپێکر، لۆما ڕۆلێ خەلکێ باکوور گەلەکێ بەرچاڤ بوو د دەستپێکرنا شوڕشا گولانێ دا.

ئەم دێ ل ڤێرێ بەحسا هەرسێ چالاکیێن لەشکەری یێن ئێکێ یێن شوڕشا گولانێ کەین. دبیت بەری ڤان چالاکیان هندەک تەقەیێن تاکە کەسی و لابەلا ل دەڤەرا بەهدینان ڕوودابن ل دژی دوژمنی، بەلێ ئەڤ چالاکیێن ئەم باس لێ دکەین، ئەو چالاکینە یێن کو ب پلان و بەرنامە هاتینە ئەنجامدان و زیانێن مەزن گەهاندینە دوژمنی و دەستکەفت ژی کەفتینە دەستێ پێشمەرگەی:

1- چالاکیا سوارا گەورک: ل ڕۆژا 21/6/1976 مەفرەزا پێشمەرگەی یا ب سەرپەرشتیا مەحمود ڕووبۆسکی/گویی ژ باکوورێ کوردستانێ، ل سوارا گەورک ل ناڤبەرا شەرانشێ و گەلیێ پساغا بۆسەیەک ل بەر دوژمنی دانا و دڤێ بۆسێ دا 4 لەشکەرێن دوژمنی هاتنە کوشتن، کو ئێک ژێ جێگرێ ئەفسەری بوو و ئێک ژی رەئیس عرەفا بوو. 3 پارچە چەک ژی دەستکەفتێ پێشمەرگەی بوون.

2- چالاکیا کەشانێ: هەر ل ڕۆژا 21/6/1976 مەفرەزا پێشمەرگەی یا ب سەرپەرشتیا سادق مەرگەهی/ ژ باکوورێ کوردستانێ، بۆسەیەک ل ناڤبەرا گوندێن کەشانێ و شلونێ ل بەر هێزێن دوژمنی دانا. د ڤی شەڕی دا، 4 لەشکەر هاتنە کوشتن و ئێک ژی بریندار بوو. 4 چەکێن کلاشینکۆف ژی کەفتنە دەستێ پێشمەرگەی.

3- ل ڕۆژا 26/6/1976 مەفرەزا پێشمەرگەی یا ب سەرپەرشتیا حەمید هەجەر گراڤی/ ژ باکوورێ کوردستانێ هێرش کرە سەر بنگەهێ (مەخفەرا) دوژمنی ل کەڤنە گوندێ هوڕکی ل دەڤەرا کێستە. پێشمەرگە شیا دەستێ خوە دانیتە سەر بنگەهێ ناڤبری و 19 لەشکەرێن دوژمنی هاتنە کوشتن کو فەرماندێ بنگەهی ژی دناڤ دا بوو، 11 ژی هاتنە دیلکرن. 22 پارچێن چەکی ژی کەفتنە دەستێ پێشمەرگەی کو 2 ژ وان رەشاشێن برێن بوون.

ل ڤێرێ ئەم دبینین کو هەرسێ چالاکیێن لەشکەریێن ئێکێ یێن شوڕشا گولانێ ژ ئالیێ مەفرەزێن پێشمەرگەی یێن خەلکێ باکوورێ کوردستانێ ڤە هاتینە ئەنجامدان. تنێ مەفرەزا مەحمود ڕووبۆسکی ئێک پێشمەرگێ باشوورێ کوردستانێ دگەل بوو، ئەو ژی عیسا ئەحمەد شەمۆ بوو.

دیسان ئێکەمین شەهیدێ شوڕشا گولانێ ژی ل دەڤەرا بەهدینان، هەر کوردەکی باکوور بوو ب ناڤێ مەهمەت ڕووبۆسکی کو برازایێ مەحموود ڕووبۆسکی بوو.