نڤێسین: عەبدولكەریم سەعید ئەرەدنی
هێرشا نهمرۆڤانە یا ل سهر دهڤهرا “سپیلکێ” هاتیه ئهنجامدان، پێشلکاریهکا زەق یا ئاسایشێ و بهزاندنا سهروهریا ئاخا ههرێما كوردستانێ بوو.
ئهڤ هێرشە نه یا ژ نیشکەکێ ڤە بوو، بهلكو پشکهک بوو ژ وان زنجیرە هێرشێن پلان بۆ دارێژتی کو ژ ئالیێ هێزێن ههرێمی و چهکدارێن کرێگرتی ڤە د ناڤا ئاخا عێراقێ دا دهێنه ئهنجامدان.
ژ دهستپێکا سالا 2024ێ وهره، ههرێما کوردستانێ ڕووبڕوویی پتری (410) هێرشێن مووشهکێن بالیستی و درۆنێن خۆكوژی بوویە. پشکا شێری بەر پایتهختا ههرێما كوردستانێ كهفتیە کو هەتا ئەڤرۆ ب نێزیکی (300) هێرشان دهێتە خەملاندن. ئهڤ هێرشە ب تنێ نە ھەژمارن، بەلکو قەبارەیا وێ دژایەتیا مەزن دیار دکەن ئەوا ل دژی قهوارەیێ دهستووری یێ ھەرێمێ دهێتە ئەنجامدان.
د ڤان هێرشێن هوڤانە دا دیار دبیت کو چ جوداهی د ناڤبەرا سەرباز و سڤیلان دا نەھاتیە کرن، ئەڤە ژی نیشانا وێ چەندێ یە کو ل دەڤ هێرشبەران نە زمانێ دیالۆگێ هەیە و نە ژی ڕێز ل پرەنسیپێن ھەڤسوویاتیێ دهێتە گرتن.
ئەڤە د دەمەکێ دایە کو هێزا پێشمهرگێ كوردستانێ ب تنێ ئەرکێ پاراستنا ئهولەهیا نیشتیمانی ئەنجام ددەت.
سهرهرای ههلویستێ ژیرانە و حهکیمانە یێ سهرکردایهتیا سیاسی یا کوردستانێ ب سهرۆکاتیا سهرۆك مهسعود بارزانی، کو چەندین جاران ب فهرمی ڕاگهاندیە: “كوردستان نه ئالیهکە د شهرێ وهلاتێ ئێران و ڕوژئاڤای دا” لێ هێرشکار ب بیانویێن بێ بنەما و ب مەرەما بەزاندنا سەروەری و بۆمبهبارانکرنا ئاخا مە، دهڤهرێن سڤیل و ژێرخانەیا ههرێمێ دکەنە ئارمانج و وەلاتێ مه کرینە قادا یەکلاکرنا ناکۆکیێن خۆ یێن شکەستی.
یا ژ دەستدرێژیێن سهربازی ب ژانتر، بێدهنگیا کوور یا حکوومهتا فیدرال ل بهغدا! لاوازیا ههلویستێ بەغدا ل هەمبەر میلیشیایێن ژ یاسایێ دهرچووی، وێ ڕاستیێ دووپات دکەت کو پشتبهستن ب “سهروهریا عێراقێ” ب تنێ خەیالەکا ئاشوپی یە. چاوا دهولهتهک دشێت دهستگرێدایی ڕاوهستیت د دەمەکێ دا ئاسمانێ ههرێمهکا دهستووری دهێته پێشێلکرن و پێشمهرگه وەک پشکەکا فەرمی ژ سیستهمێ بهرهڤانیا نیشتیمانی دهێنە ئارمانجکرن؟
ئهڤڕو گهلێ کورد ل هەمبهر بهرپرسیاریهکا دیرۆکی یە. پێدڤی یە ژ هەر دەمەکێ زێدەتر ڕێزێن خۆ ئێک بێخین و ل ژێر سێوانا قەوارەیێ هەرێما كوردستانێ ئێکگرتی بین. چونكە دیار بوو دوژمن جوداهیێ نائێخیتە د ناڤبەرا چ دەڤەر و ئالیان دا و ئارمانجا وان یا سەرەکی شکاندنا ئیرادەیا گهلێ کورد و لاوازکرنا ئهزموونا مه یا دیموکراتی و سهرکهفتی یە د ناڤ جهرگێ ڕوژههلاتا ناڤین دا.
