نڤێسین: لوقمان عوسمان گەڵالەیی

کوردستان ئێک مالە، ئەوێن خۆزیا وێرانبوونا کوردستانێ بخوازن، بلا ژ شۆناسا خۆ ب گومان بن.

ئەم ل سۆشیال میدیایێ گەلەک جاران دبینین کو هندەک کەس هەنە، چاڤێن وان تاری بوویە و دڵ و دەروونێ وان تژی بوویە ژ ڕق و کینێ، نە ب تنێ ل دژی لایەنەکێ سیاسی، بەلکو خوازیارێ وێرانبوونا ئاخ و نیشتیمانی ژی بوونە.

ئەوێن چاڤەڕێی درۆن و موشەکان دکەن داکو خەونێن خۆ یێن گەنی زیندی بکەن، بلا باش بزانن کو موشەک و درۆنێن دوژمنان جوداهیێ د ناڤبەرا ڕەنگان دا ناکەن، چونکە مەرەما وان ب تنێ شکاندنا کەرامەتا تاکێ کورد و لاوازکرنا کوردستانێ یە.

سەرێ ڕەش و ئەڤرازێن ئاسێ یێن بارزان ب تنێ جهەکێ جوگرافی نینن، بەلکو نیشانا خۆڕاگریێ و کەلھێن ئاسێ و خوڕستی یە، لەوا نەیارێن ڤێ ئاخێ ب ساناھی نەشێن بھەژینن. ئەوێن ھزر دکەن کو ب ھێرشا نەیاران دێ ئیرادەیا نەتەوەیەکێ ھێتە شکاندن، بلا لاپەرێن مێژوویێ ڤەدەت، دا بزانیت کا چەندا ئەو خەونە دگەل خۆ برینە بن ئاخ و کوردستان هەر بەرز و بلند مایە.

پەیامەک بۆ ئەوێن فۆبیا (سەرێ ڕەش) هەیی
ئەگەر تە کێشەیا سیاسی دگەل لایەنەکێ هەبیت، ڕێکەکا مەردانە بگرە بەر، نەک ببیە دەهۆڵقوت بۆ موشەکێن بیانیا. هەڤسۆزی و دلخۆشی ب هێرشێن دوژمنی بۆ سەر هەر بھۆستەکا ئەڤێ ئاخێ، نیشانا بێ ڕەوشتیا سیاسی و نەپاکیەکا زەقە ل ھەمبەر گەل و نیشتیمانی.

ئاساییە دوژمن هێرشی ئەوان جهان بکەت ئەوێن بەرەڤانیێ ل ئالا و ئاخا کوردستانێ دکەت، لێ یا نه‌ئاسایی و شەرمەزاری ئەوە هندەک هەبن خۆ ب کورد دانن و دەستخۆشیێ ل وان هێرشان بکەت.

کوردستان دێ ب ئارامی مینیت و نەحەز ژی د ناڤ کەرب و کینا خۆ دا خەندقیت. مێژوو دلۆڤانیێ ب کەسێ نابەت، سوبەهی دەمێ تۆز و دومانا ڤان پیلانا نەما، ب چ روو هوون دێ تەماشەی سەروچاڤێن نەڤیێن خۆ کەن؟

بژیت کورد، بژیت کوردستان
سەربەرزی بۆ پارێزەرێن نیشتیمانی و شەرمەزاری بۆ جاش و خۆفرۆشان.