نڤێسین: ئەحمەد زوبێر بانی
سپێدە ل كوردستانێ د ڕووكەش دا نە یا جودا بوو ژ سپێدەیێن دی، لێ ئەو ئەردێ كو ب سەدان سالە ناڤێن شەهیدان د سینگێ خۆ دا پاراستین، خۆ بەرهەڤ دكر بۆ تۆماركرنا شەش ناڤێن نووی د تۆمارا خۆ یا گران دا.
ئەو تۆپبارانا كو بارەگایێ پێشمەرگەی كربووە ئارمانج، نە تنێ رویدانەكا بورى بوو د ناڤ دەنگوباسان دا، بەلكو دەمەكێ ئێكلاكەر بوو د ناڤبەرا وێ ژیانا وان دپاراست و وی مرنا كو بێ ئاگەهداری ب سەرێ وان دا هاتی، تۆپبارانەكا غەدر و بێ بەهانە، وەكو بڤێت ل سەر ئارامییا چیایی و خۆراگرییا مرۆڤێ كورد هەڤدەم تاقی بكەت.
پێشمەرگە نە تنێ زێرەڤانن، ئەو پارێزەرێن یادگارییانە، خودانێن وی خەونێ نە یێ كو چ جاران كێم نەبووی سەرەرای هەمی دەردەسەریێن ب سەر ڤی گەلی دا هاتین. دەمێ شەش ژ وان دبنە شەهید، وەك ژمارە ناكەڤنە د لیستەیێ دا، بەلكو وەك چیرۆكێن تەمام یێن كو ب نێیشكەکێ ڤە هاتینە بڕین، وەك ئەو دەیكێن كو چاڤەرێی زڤرینەكا بێ ئۆمێدن، وەك ئەو زارۆكێن كو دێ مەزن بن و فێری وێ چەندێ بن كو نیشتیمان جارنان ب بهایەكێ گران دهێتە پاراستن.
ئەو تۆپبارانە نە تنێ بارەگایەكێ سەربازی كربووە ئارمانج، بەلكو فكرەیەك كربووە ئارمانج؛ فكرەیا وێ چەندێ كو كوردستان دشێت ب ئاشتی بژیت، ئەو مێرخاسێن كو چەك هەلگرتی بۆ پاراستنا ئاخا خۆ، هەژی وێ چەندێ یە خەونێ ب ژیانەكا ئاسایی ڤە ببینن. لێ ب شێوەیەكێ دی ب هێزتر لێ كر، كو ئەڤ رێبازا شەهیدان نە ب تۆپبارانێ دهێتە ژناڤبرن، نەژی دشكێت.
د دەمێ تەقینێ دا رەنگە دەم بوەستیت، لێ د یادگاریا گەلان دا دەمەكێ دی دەستپێدکەت، دەمێ دووبارە دارشتنا واتەیێ، كو خوین دبیتە پەیام و وونكرن دبیتە هێز. شەهیدبوونا وان نە دووماهی بوو، بەلكو درێژەپێدەرا زنجیرەكا درێژ یا قوربانیدانێ بوو ئەوا شۆناس و ناسنامەیا كوردستانێ ئاڤاكری، ناسنامەیەك كو نە تنێ ل سەر ئێش و ئازارا ئاڤا بوویە، بەلكو ل سەر پێداگرییا وێ چەندێ كو مان بژارە نینە بەلكو قەدەرا مەیە.
رەنگە جیهان پرسیارا مفا و سەدەمێ بەردەوامبوونا ڤێ خوینرێژییێ بكەت، لێ بەرسڤ نە تنێ د سیاسەتێ دایە، بەلكو د وێ پەیوەندییا نھێنی د ناڤبەرا مرۆڤ و ئەردێ وی دایە. دەمێ ئەرد دهێتە تۆپبارانكرن، مرۆڤ پتر پێ ڤە دنووسیت و دەمێ خەون دهێتە ئارمانجكرن، پتر رۆهن دبیت.
شەش شەهید… ژمارەیەكێ بچووكە د هەژمارێن شەڕی دا، لێ د دلێ كوردستانێ دا گەردوونەكێ تەمامە. هەر ئێك ژ ئەوان پشكەك ژ چیرۆكێ هەلگرتبوو، ب چوونا وان چیرۆك بەرزە نەبوو، بەلكو ب رەنگەكێ كویرتر هاتە نڤێسین، چونكی كوردستان وەكو كورد دبێژن، ب ژمارەیا زیانان ناهێتە پیڤان، بەلكو ب شیانێن وێ یێن رابوونێ پشتی هەر زیانەكێ دهێتە ناسین.
رێبازا شەهیدان دێ مینیت، نە وەك درووشم، بەلكو وەك راستییەك كو پێ دهێتە ژیان. كوردستان دێ مینیت، نە ژبەر كو ئێكی سۆز دایە، بەلكو ژبەر كو ئەوێن كەتین هەتا دووماهی چركە باوەری پێ هەبوو. و هەر دەمێ دهێتە ئارمانجكرن، سەلماند كو ئەو نە تنێ ئەردە بەلكو رێبازەکە و نامریت.
كوردستانا كو ژ برینێن خۆ فێری ڕابوونێ بووی، ل بەر ئێشێ ناچەمیت، بەلكو ئێشێ دگۆهۆڕیت بۆ هێزەكێ دا بەرەڤ پێش بچیت. ئەڤە نە جارا ئێكێ بوو كو خوینا پێشمەرگەی دهێتە رشتن، رەنگە نە یا دووماهییێ ژی بیت، لێ ئەوا هەر دەم دهێتە گوهۆرین ئەوە كو هەر دلۆپەكا خوینێ واتەیەكا نووی ددەتە خۆراگرییێ، و باوەرییێ كویرتر دكەت كو ئەڤ رێكە هەر چەند یا ب زەحمەت بیت، هەژی وێ چەندێ یە مرۆڤ هەتا دووماهییێ تێدا بچیت.
ئەوێن د وێ تۆپبارانێ دا چووین، نە تنێ بوشاییەک ل پشت خۆ هێلان، بەلكو وەسیەتەكا نە نڤیسى هێلان؛ كو ئەرد یێ پاراستی بیت، و خەون یا ساخ بیت، و خەم نەبیتە خۆدەستدان. خەم ل كوردستانێ ب روندكان ناهێتە پیڤان، بەلكو ب وێ ئیرادەیا ل پشت خۆ دهێلیت دهێتە ناسین.
رەنگە بارەگا بهێنە رووخاندن، كوین و خیڤەت بهێنە سۆتن، لێ ئەوا ناهێتە تۆپبارانكرن ئەو باوەریا جێگیرە د ناڤ دلێ خەلكی دا، كەرامەت ناهێتە پشك پشك كرن و ئەو ئەردێ ب خوینێ هاتیە ئاڤدان ناهێتە بەردان. ژبەر هندێ، هەر بزاڤەك بۆ شكاندنا ڤێ ئیرادەیێ، تنێ دێ وێ ب هێزتر لێ كەت.
ناڤێن هەر شەش شەهیدان دێ میننە كۆلاى، نە تنێ د یادگارییا خێزانێن وان دا، بەلكو د ویژدانا گەلەكێ تەمام دا كو وان وەك ئاوێنەیا چیرۆكا خۆ یا درێژ دبینیت، چیرۆكا گەلەكێ كو نەخۆشی هەلنەبژارتینە، لێ هەلبژارتیە كو ل بەرانبەر وان سەرێ خۆ ناچەمینیت.
هۆسا گۆتار ب شەهیدبوونا وان ب دووماهی ناهێت بەلكو ل وێرێ دەستپێدکەت. چونكی چیرۆكا راستی نە د دەمێ چوونا وان دایە، بەلكو د پشتی وێ دایە؛ كا دێ چەوا هێتە گۆتن، و چەوا هێتە هەلگرتن، و چەوا دبیتە هێزەك بۆ ئاڤاكرنا پاشەرۆژێ… بەرەباب پشتی بەرەبابی.
ل ڤێرێ، قوربانیدان ژ رویدانەكێ دهێتە گوهۆرین بۆ كەلەپوورەكی، ژ زیانەكێ دبیتە واتەیەك كو زارۆك ژ باب و كالێن خۆ وەردگرن. شەهید ب تەمامی ناچن، بەلكو پارچەیێن خۆ ل هەر كوچە و كۆلانەكا نیشتیمانی دهێلن؛ د وان رێكان دا یێن تێدا چووین، د وان چیایان دا یێن خۆ تێدا پاراستین، و د وان دلان دا یێن كو دێ هەر دەم ل بیرا وان بن.
ژبەر كو كوردستان فێری وێ چەندێ بوویە كو ژ بن كاڤلان ڕابیت، ئەڤ ئێشە دێ بیتە وەرزەكێ نووی؛ وەرزەك كو دێ ب ئیرادەیا ئەوێن ماین هێتە نڤیسین، ب وێ باوەرییا كو ئەو خوینا هاتیە رشتن نە بەلاش بوو، بەلكو بهایێ مانا تشتی بوو یێ كو ب پارەی ناهێتە كرین.
رەنگە رۆژ ببورن و بارودۆخ بگهورن، لێ ئەوا نەهێتە گهورین ئەو راستییا جێگیرە، كو ئەو گەلێن دزانن چەوا برینێن خۆ بكەنە هێز، چ جاران ناشكێن. و كوردستانا كو گەلەك قوربانی داین دا كو بمینیت، باش دزانیت چەوا بەرخەکرنێ بكەتە پالپەروەر، و خەمێ بكەتە بڕیار، و یادگارییێ بكەتە پاشەرۆژ.
ل دووماهییێ، دووماهی نە مالئاڤایی یە بەلكو پەیمانە؛ پەیمانەك كو ئەڤ ئەردە بمینیت وەكو ئەوێن چووین دڤیا، ب سەر بلندی، ب خۆراگری و یا تژی بیت ژ ژیانێ سەرەرای هەمی تشتان. ئاها هۆسا چیرۆك بەردەوام دبیت… نە ب دەنگێ تۆپبارانێ، بەلكو ب دەنگێ وان یێن هەتا نوكە باوەر دكەن كو كوردستان هەتا هەتایێ دێ هەر مینیت.
