ئەڤرۆ 12ێ گولانا 2026ێ ب ھەلکەفتا بوورینا 33 ساڵان ل سەر دامەزراندنا بنگەھێ لالش یێ ڕەوشەنبیری و جڤاکی، بەڕێز سەربەست لەزگین، ئەندامێ مەکتەبا سیاسی و بەرپرسێ مەکتەبا ڕێکخستنا پارتی دیموکراتی کوردستان ل بەھدینان، ب یاوەریا بەڕێزان دکتۆرە ڤیان سلێمان و سەباح بەیتوڵڵا، ھاریکارێن بەرپرسێ مەکتەبێ، دکتۆر نەوزدا عەبدولڵا بەرپرسێ لقێ ئێک و ھاژمارەکا کادرێن پێشکەفتی، سەرەدانا بنگەھێ ناڤبری کر و ژ لایێ بەرپرسێ دەستەیا کارگێڕی و دەستەبژێرەکا ڕەوشەنبیر و کەسایەتیێن کوردێن ئێزدی ڤە ب گەرمی هاتنە پێشوازیکرن.

د دیدارەکێ دا، بەرپرسێ مەکتەبا ڕێکخستنێ ساڵڤەگەڕا دامەزراندنا بنگەھێ لالش پیرۆزکر و بزاڤ و چالاکیێن بنگەھی د خزمەتکرنا کەلتوور و ڕەسەناتیا کوردێن ئێزدی دا بەرز نرخاندن و دەستخۆشی ل کارگێڕیا بنگەھی کر بۆ وی ڕۆڵێ مێژوویی یێ د ڤان 33 ساڵێن بووری دا گێڕای.

هەروەسا پشتەڤانیا تەمام یا پارتی دیموکراتی کوردستان بۆ کار و پرۆژەیێن بنگەھێ لالش نیشا دا، وەک ناڤەندەکا گرنگا ڕەوشەنبیری و جڤاکی د ناڤا جڤاکێ کوردستانێ دا.