نڤێسین: خالد ئەحمەد

عێراق د دلیڤەکا هەستیار و دیرووکی دا دەرباز دبیت، قۆناغا پشتی 2003ێ بەرەف دوماهیێ ڤە د چیت. سیمایێ ڕۆژهەلاتا ناڤینا نوی یێ دیار دبیت. هەلدانا ئالایێ سپی ژ لایێ ڕادیکالێن ئیسلامی ڤە ژ هەر دەمەکی نێزیکتر لێھاتیە، بەلکو هندەکا هەلدایە ژی.

سیستەمێ دیموکراتیا فیدرال مینا ئاخا عێراقێ لڤۆک مایە، سنوورێن وێ ل بەر ڕەشەبایێن هەرێمی و نیڤدەولەتی د ھلێڤرینە. ئابوورێ وێ ھێشتا دیلگرتی و ئێکانە و دادڕیایە. گەندەلی د دفنێ ڕا دەرکەفتیە، گروپێن چەکدار د سەر دەولەتێ دا نە.

ل وەڵاتێن سڕوشتی د دەلیڤەکا هۆسا مەترسیدار و ب زەحمەت دا، سەرکردە و خەلک بەرەف نێزیکبوون و ئێگرتن و ئوپشنێن ب هێز ڤە دچن و باشترینا ژێدگرن بۆ وەرگرتنا بەرپرسیارەتیا گەل و وەلاتی. یا ئەم ل ئیراقێ د بینن بەرۆڤاژییە، پشتێ سەرکردێن هێلا ئێکی ب کێر بەرپرسیارەتیا فەرمی و سیاسی نەهاتین، هەلامەت بەربژێرکرینە و داینە پێشیا خوە!

کوالتیا کەسایەتیێن هەرسێ سەرۆکاتێن عێراقێ داینە پێش ئاشکەرا دکەن، کانێ سیستەمێ حوکمڕانی چەند یێ سەقەت و نەساخ و گەندەلە. بەرچاڤدبیت کانێ دەولەت تا چەند بوویە پاوان وئێخسیرا بەرژوەندی، مۆراڵ و یاریپێکرنا گروپ و کەسایەتێن کو خوە ب سەر ژێوار و سامانێ و جومکێن دەولەتێ دا سەپاندی.

ئەوا گومانێ هەلنەگریت ئەوە، ئەڤ ژێگرتنە د ڤێ قوناغێ دا دێ برینێت عێراقێ کویرتر لێ کەتن و دێ ب ساناهیتر هێتە نێچیرکرن ژ لایێ هێزێن میلیشیاوی و هەرێمی و نیڤدەولەتی ڤە و دێ بیتە وەلاتەکێ کارپێکری، نەک کاربکەر، دێ بیتە ئێخسیرا قەیران و شەڕ و دوبەرەکیان و نقوی گرفتاریێن ئابووری بیتن.

چارەنڤیسێ شەڕێ سار و گەرمێ ئەمریکا و ئیسرائیل دگەل ئیرانێ دێ باندۆرەکا ئێکجار مەزن ل سەر ئایندێ عێراقێ چێکەتن .هەمی بەڵانسێن هێزا لەشکەری و ئابووری و ستراتیژی، چارەنڤیسێ ململانێ ئاشکەرا دکەن و قوناغەکا نوی یا پشتی شۆڕشا ئیسلامی ل ناڤخوەییا ئیرانێ و دەڤەرێ دێ دەسپێکەتن. شەڕێ نوکە شەڕێ ب دەستڤەئینانا دەمی یە، نە زێدەتر.

هەیڤا ل پێشیا مە دێ یا ڤەکری بیت هەمبەری ئالیێن شیعە کو کار ل سەر ئاڤاکرنا کابینێ بکەن وهەیڤەکێ دەمی ب دەستڤەبینن. ب دیتنا چاڤدێران د هەیڤا ل پێشیا مە ترازیا کێشێ، دێ ل ئاستەکی ڕاوەستیت و دیاربیتن کانێ عێراق دێ ب چ ئالی دا داکەڤیت و ڤەهەژیێت و چارەنڤیسێ عێراقێ و سەرکردێن هەلامەت ئێکلکەتن.