نڤێسین: عبدالعزیز محسن بارزانی
د فەلسەفەیا سیاسی یا جەنابێ سەرۆک مەسعود بارزانیدا، بەرژەوەندیا بلندا نەتەوەیی ھەردەم ل پێش بەرژەوەندیا حزبی بوویە. دیرۆکا نێزیک ب دەهان بەلگەیان دەردێخیت کو سەرۆک بارزانی، پێخەمەت پاراستنا ئێکڕێزیێ و تەبایا نیشتمانی، فشار ل پارتی دیموکراتی کوردستان کریە کو دەست ژ مافێن خوە یێن هەلبژارتنێ بەردەت دا کو پرۆسەیا سیاسی ل هەرێمێ و عێراقێ پەک نەکەڤیت.
میناک، د سالا 2009 دا ل دوکان و ل سەر داخوازیا رەحمەتی مام جەلال تالەبانی بۆ هاریکاریا ئێکەتیێ، پۆستێ سەرۆک وەزیرێن هەرێما کوردستانێ دا بەرێز بەرهەم ئەحمەد صالح، کابینا شەشێ هاتە پێکئینان و ئەو پۆست مافێ پارتی بوو.
د سالا 2010 دا ل سەر هەلبژارتنا سەرۆک کۆمارێ عێراقا فیدرال ئەمریکیان و هندەک وەلاتێن دی ژی نە دڤیان رەحمەتی مام جەلال تالەبانی دووبارە ببیتە سەرۆک کۆمارێ عێراقێ و وان دڤیا پۆستێ سەرۆک کۆماری بۆ سونەیان بیت. لێ جەنابێ سەرۆک بارزانی هەلویست وەرگرتن و ئیدارەکا بهێز دڤێت ئەڤ پۆستە هەر بۆ کوردان بیت و دناڤ کوردان ژی بۆ مام جەلال بیت.
د سالا 2014 دا بزاڤا گۆران ل پەرلەمانێ عێراقا فیدرال بتنێ 9 کورسی هەبوون ل سەر داخوازیا رەحمەتی نەوشێروان مستەفا پۆستێ جێگرێ سەرۆکێ پەرلەمانی دا بەرێز ئارام شێخ محەمەد کو ئەوژی مافێ پارتی بوو.
د سالا 2026 دا و ل رێکەفتی 7/5/2026 سەرۆک بارزانی پێشنیار کریە پۆستێ وەزیرەکێ کورد ل پشکا پارتی ل بەغدا بدەنە بەرێز سەردار عبداللە، نڤیسکار و سیاسەتڤان ژبەر هەلویستێن وی یێن نەتەوەیی و نیشتمانی.
مە نەڤێت گەلەک پاشڤە بزڤرین و بەحسێ هەمی رۆل و هەلویستێن جەنابێ سەرۆک بارزانی بکەین ژبەرکو ب گوتارەکێ هەمی ناهێتە نڤێسین، هەرکەس دزانت سەرۆکی بۆ رۆژئاڤا و باکور و رۆژهەلات چ کریە و چ هەلویست هەبووینە داکو گەلێ کورد ب سەرفەرازی و سەربلندی بژیت. ب بیرو باوەریێن خۆ یێن نەتەوەیی و نیشتیمانی دگەل دەولەتێن هەرێمی و زلهێزێن جیهانی ب هەلویستێن خۆ یێن نەگور بەرنیاسە.
رەنگە دڤێ حەفتیێ دا کابینا عەلی زەیدی سویندا یاسایی بخون، لەورا گەلەکا گرنگ و پێدڤییە لەز ل پێکئینانا کابینا 10ێ یا حکومەتا هەرێما کوردستانێ ژی بهێتەکرن بۆ هندێ هەردوو حکومەت ب بەرنامە و باشترین پلان خزمەتا عێراقا فیدرال و هەرێما کوردستانێ بکەن و خەلک ببیتە سەنتەر بۆ خزمەتکرنێ. ژبەر هندێ دڤێت هەمی لایەنێن سیاسی ب تایبەت پارتی و ئێکەتی لایەنێ نەتەوەیی و نیشتیمانی ل پێشیا هەمی کارەکێ دی بیت.
گەلەک جاران خەلک دبێژن ئەم نزانین بۆچی هەلبژارتن دهێنەکرن، مادەم گرنگی و رێز ل دەنگێ خەلکێ ناهێتە گرتن. کانێ هەر لایەنەکێ خەلکی چەند دەنگ داینێ بلا ل سەر وی بنیاتی رێزێ ل دەنگێن خەلکێ بگرن و کوردو کوردستان ل بەرچاڤ بهێنە وەرگرتن ل هەمی خالێن لاوازێن چویی باشترین کابینا بهێز بهێتە پێکئینان و باشترین خزمەت پێشکەشی خەلکی بکەت.
جەنابێ سەرۆک بارزانی دڤێت ب ئەزموون و سیاسەتا خۆ یا حەکیمانە، هەمی لایەنێن سیاسی کوم بکەت بۆ بەرژەوەندیا کوردستانێ و پاراستنا ئەڤان دەستکەفتان، بەری هەمیان فشارێ ل پارتی بکەت بۆ پێکئینانا کابینا 10ێ چونکە جەنابێ وی لێڤەگەرێ گەلێ کوردو خەلکێ کوردستانێ یە.
چێنابیت لایەنێن دەرەکی فشارێ بکەن داکو کابینا نوی ل هەرێما کوردستانێ بهێتە پێکئینان، د سالێن بوریدا هەمی کابینێن حکومەتا عێراقا فیدرال ب دەستپێشخەریێن سەروک بارزانی دهاتنە پێکئینان. د نوکە ژی دا دڤێت هەر جەنابێ سەرۆک بارزانی کوردستانێ لڤێ قەیرانێ رزگار بکەت.
من ئومێدەکا مەزن هەیە کو جەنابێ سەروک بارزانی زێدەتر هەر کەس و لایەنەکێ هزر دڤێ چەندێ دا دکەت، لێ بۆچوون و پشتەڤانیا هەمی خەلکێ دلسۆز و خەمخور ب تایبەت ژی کەس و کارێن بلندێن شەهیدان و زیندانیێن سیاسی و پێشمەرگێن قارەمان گەلەکە بۆ جەنابێ وی، ئەز ژی وەکو کورە شەهیدەک برا شەهیدەک دبێژم؛ ئەزبەنی وەکو هەر جار ئەڤێ جارێ ژی کوردستانێ لڤێ قەیرانێ رزگار بکە، چونکە گهورینێن دەڤەرێ ژی ڤێ چەندێ دخوازن.
ئەم چاڤەرێ هیمەت و بریارێن حەکیمانە یا جەنابێ سەرۆک بارزانی نە.
