نڤێسین: پ.د عبدالرحمن سپینداری
پتر ژ سەد سالانە – زێدەباری بەری ھینگێ– کورد ب خوینا سار ب دەستێ موسلمانان ل وان دەولەتێن ئیسلامی یێن کو کوردستان د ناڤبەرا خۆ دا پارچە پارچە کرین، یان ژی ب دروستی بێژین کوردستان داگیرکری، دهێنە کوشتن. یا بالکێش ئەوە کو ب دەهان سالانە دبێژنە کوردا: “مافێ هەوە نینە گله و گازندان ژ دەولەتێن ئیسلامی یان موسلمانان ب گشتی بکەن، چونکی ئەوێن حوکمێ وەلاتێن داگیرکەر دکەن نوونەراتیا ئیسلاما دروست ناکەن و عەلمانی نە.”
پشتی گەهشتنا ئیسلامیێن شیعە بۆ سەر دەستهەلاتی ل ئیرانێ و بەردەوامبوونا کوشتنا کوردان ب دەستێ “پاسدارێن شۆرشا ئیسلامی”، دیسا دگۆتنە کوردا: “هوین نەشێن گله و گازندان ژ موسلمانان بکەن، چونکی حاکمێن ئیرانێ شیعە نە و نوونەراتیا ئیسلامێ ناکەن.”
ل سەردەمێ “مەهیبێ چاڵێ” (سەدام حوسێن)، گۆتنە کوردان: “هەوە مافێ گازندان نینە، چونکی ئەو پارێزەرێ دەروازەیا ڕۆژهەلاتێ نەتەوا عەرەبی یە ژ دوژمنێ سەفەوی، و ئۆمێدا ئومەتێ یە بۆ ڕزگارکرنا قودسێ.” لێ وی ل شوونا پاراستنا دەرگەهێ عەرەبان یان ڕزگارکرنا قودسێ، هەڵمەتێن ئەنفالێ ل دژی کوردان ڕاگەهاندن، ب هزاران گوند وێران کرن و ب سەدان هزار کورد د گۆڕێن ب کۆم دا بن ئاخ کرن.
پاشان ئەردۆغان هات، یێ کو د چاڤێ زۆربەیا ئیسلامیێن کورد و غەیرە کورد دا میناک و پێشەنگێ بزاڤێن ئیسلامی بوو، لێ د سەردەمێ وی دا کوشتن و وێرانکاری بەردەوام بوو، نە تەنێ ل باکور و ڕۆژئاڤا، بەلکو ل باشوورێ کوردستانێ ژی گوندێن مە هاتنە تێکدان. دیسا
دگۆتنە کوردان: “گازندان نەکەن، چونکی ئەو هێشتا ب تەمامی نەبوویە خودان دەستهەلات و دەولەت یا ئەتاتۆرکی یە.”
دوماهیک جار، پشتی ئیسلامیێن سوننە ل سووریێ ب ڕێکا رێککەفتنەکا تورکی-ئیسرائیلی-ئەمەریکی دەستهەلات ل هندەک دەڤەران گرتیە دەست، ستەم و کوشتن و تالان و تا “کەنێزەکردن” ل ژێر دەنگێ (الله أكبر) بەردەوامە. سەرەڕای وێ یەکێ کو کوردان و ب تایبەت هەرێما کوردستانێ پشتەڤانیا شۆرشا سووریێ ل دژی دیکتاتۆری کری، لێ نوکە دبێژنە کوردان: “ئەڤ شەڕە نە دژی کوردانە، بەلکو دژی گروپەکێ کوردی یە کو نوونەراتیا کوردان ناکەت.” ئەڤە د دەمەکێ دایە کو ب دەهان ڤیدیۆ یێن ” جیش العربي السوري” و هێزێن سەر ب تورکیا ڤە هەنە کو ب ڕک و کین و جوداخوازی و توندڕەوی دگەل کوردان سەرەدەریێ دکەن، تەنێ ژبەر کو کوردن، د دەمەکێ دا کو هێزێن ئیسرائیلی ب ئازادی ل گوند و باژێرێن سووریێ و جۆلانێ دگەڕێن و “غیرەتا” ڤان هێزان نالڤیت.
یا سەیر ئەوە، د درێژاهیا ڤان هەموو سالێن پڕی ئەنفال و کوشتن و تعریب و تەتریكێ دا، کوردان هەردەم پشتەڤانیا کێشەیێن موسلمانان و کێشەیا فەلەستینێ کریە و ب مال و گیان قوربانی داینە، و ئەڤە ب ئەرکەکێ ئیسلامی و مرۆڤی زانیە. کوردستانا ئەڤڕۆ باشترین بەڵگەیە کو بوویە پەناگەها هەموو نەتەوە و ئاینان.
پرسیار ئەڤەیە: ئەرێ ژ ئەڤڕۆ پێڤە، مافێ موسلمانان هەیە گله و گازندان ژ کوردان بکەن ئەگەر پشتەڤانیا کێشەیێن وان نەکەن؟
ڕەنگە هندەک بێژن: “موسلمانا و عەرەبا خیانەت ل فەلەستینیان ژی کریە.” ئەم دبێژین: ڕاستە خیانەت ل وان ژی کریە، لێ ل سەر ئاستێ مەعنەوی پشتەڤانن و چ جار فەلەستینیان ب جوداخواز یان تێکدەر ناڤناکەن، و کوشتیێن وان ب شەهید دزانن، لێ بۆ کوردان وەسا نینە، چونکی ب دیتنا وان بکوژێ کوردان موسلمانە (عەرەب، تورک یان فارسە).
ژ لایەکێ دی ڤە، پتر ژ سەد سالانە کورد دهێنە خاپاندن ژ لایێ زلهێزان ڤە، یان ژی بلا بێژین کورد خۆ دخاپینن. ل گەل عوسمانیان دژی سەفەویان ڕاوەستان تا سەرکەفتین، پاشان عوسمانیان میرنشینێن کوردی ئێک ل دویڤ ئێک ژناڤبرن. پاشان ئەمەریکا ل سالێن ١٩٧٥ و ٢٠١٧ و نوکە ژی ل ڕۆژئاڤا چەوا کورد خاپاندن.
ئەرێ دەم نەهاتیە کورد تێبگەهن کو ئەمەریکا و زلهێز چ گرنگیێ ب مافێ کوردان و چارەنڤێسێ وان نادەن؟ و دەم نەهاتیە کورد بزانن کو عەرەب و تورک و فارس مە وەک برا نابینن مەگەر ئەم خزمەتکار یان کویلێن وان بین؟ دەمێ ئەم داخوازا دەولەتەکێ دکەین کو کەرامەتا مە بپارێزیت، دبیتە جوداخوازی و پارچەکرنا ئومەتا ئیسلامی، ئەو ئومەتا کو بخۆ یا بوویە پتر ژ پێنجی دەولەتان و ل سەر چەند بھۆستێن ئەردی شەڕێ ئێکودوو دکەن!
وەرگێڕان بۆ سەر زمانێ کوردی ادریس اسماعیل تروانشی
