نڤێسین: ئیدریس ئیسماعیل تروانشی
د ڤان ڕۆژێن چارەنڤیسساز دا، کو خەلکێ مە ل ڕۆژئاڤایێ کوردستانێ ڕووبڕووی مەترسیێن مەزن یێن قڕکرنێ دبیت، پێدڤییا مە ب ئێکدەنگی و ئێکڕەنگیێ ژ هەر دەمەکی پترە. بڕینا کەزیا وێ شەڕڤانا کورد، برینەکا گران د دلێ هەر کوردەکێ نیشتمانپەروەر دا چێکر، لێ ئەو کەزی بۆ سیمبۆلا پیرۆزا ئێکگرتن و ھشیارکرنا نەتەوا کورد، بۆ ڕووبڕووبوونا دوژمنی و پشتەڤانیکرنا ڕۆژئاڤایێ کوردستانێ.
سیمبۆلێن نەتەوەیی: چەتەرێ پاراستنا مە
سیمبۆلێن نەتەوەیی، مینا: ئالایێ ڕەنگین، سروودا “ئەی ڕەقیب”، و پیرۆزییا ناڤێ “پێشمەرگە”، بتنێ هێما نینن، بەلکو خالێن هەڤپشک و کۆمکەرن؛ ئەو چەترن کو مە هەمییان د ناڤ جیهانا سیاسەتێ دا دپارێزن، لەورا پێدڤیە ئەم هەمی ل سەر بنەمایێن وان کۆک بین. دەمێ ئەم ل ئەورۆپا، ئەمریکا و کەنەدا دڕژینە سەر جادان، جیهان ب چاڤێ “نەتەوە” تەماشەی مە دکەت، نەک وەک “حزب و گرۆپ”.
دەمێ ئافرەتەکا کورد یا ب ناڤ ساڵڤەچووی ل ھەولێرێ، پارەیێن دەرمانێن خۆ یێن ئێشا گران پێشکەشی زاڕۆکێن ڕۆژئاڤا دکەت، بتنێ کوردبوونە ھەستێ وێ دھەژینیت.
دیپلۆماسیەتا سەرۆک بارزانی و هەوڵێن نەتەوەیی
د ڤێ قەیرانێ دا، مە دیت کا چەوا جەنابێ سەرۆک مەسعوود بارزانی ب سەنگا خۆ یا نیڤدەولەتی و د ڤی تەمەنێ دا، هەوڵێن بێڕاوەستان دان بۆ دوورخستنا مەترسیا شەڕی؛ چ ب ڕێیا مێڤانداریکرنا جڤینا دناڤبەرا لایەنێن ئەمریکی و کوردی، تا دگەهیتە پەیوەندیێن بەردەوام دگەل کاربەدەستێن سووریێ و دیدار دگەل قەداسەتا پاپایێ ڤاتیکان.
هەروەسا، هەوڵێن بەردەوام یێن سەرۆکێ هەرێما کوردستانێ و لۆبییا ب هێز یا ڕێزدار مەسروور بارزانی ل داڤۆس و دیدارێن نیڤدەولەتی، و گەھاندنا وان ھەمی ھاریکایان ب ڕێیا دەزگەھێ خێرخوازیێ بارزانی، هەمی ئاراستەکری بوون بەر ب دوورخستنا مەترسیا شەڕی و دابینکرنا پێداویستی و مافێن ڕەوا یێن مللەتێ کورد ل ڕۆژئاڤا.
بەرژەوەندییا گشتی یان یا حزبی؟
ل ڤێرێ، وەک خەمخورەکێ ئەڤێ دۆزێ، گازندەیەکا برایانە د دەمەکی دا کو گەلێ کورد ب هەمی چین و توێژێن خۆ ڤە، ب ئێک دل و بۆ ئێک ئارمانج ڕژیاینە سەر جادەیان، پشتەڤانییا وان بۆ لایەنەکێ سیاسی نەبوو، بەلکو بۆ گەلێ کورد و دۆزا وی یا ڕەوا بوو.
جهێ داخێ یە د دەمەکێ وەسا هەستیار دا گەلەک جهان دیمەنێ وێ ئێکڕێزیێ دهاتە تێکدان ب بلندکرنا ئالا و وێنەیێن تایبەت یێن هندەک لایەنێن سیاسی، کو ئەو لایەنێن سیاسی ل دەف گەلەک وەلاتان ب چاڤەکێ دی دهێتە نیاسین، پێدڤی بوو ھەمی ئالیێن سیاسی و ھەمی بزاڤ و چاڵاکی ل ژێر سیبەرا ئالایێ کوردستانێ ھاتبانە ئەنجامدان.
بلندکرنا ئالایێن جۆراوجۆر یێن باسکێن جودا یێن حزبی، نە وی لایەنێ سیاسی، نە ژی چ ھێزێن دی مەزن ناکەن، بەلکو دبیتە ئامرازا پرت و بەڵاڤیێ و پەیداکرنا دلساریێ د ناڤ خەلکێ مە یێ نیشتمانپەروەر دا، ھەروەسا دەلیڤەی د دەتە نەیاران کو دۆزا مە یا ڕەوا بچووک بکەن و وەکو چالاکیەکا حزبی نیشان بدەن.
بەرەف ئاسۆیەکی ئێکگرتی
تشتێ بالکێش و جهێ دەستخۆشیێ ئەوە کو پشکا پتر یا هێز و لایەنێن سیاسی یێن هەر چوار پارچەیێن کوردستانێ، کراسێ بەرتەنگێ ئایدیۆلۆژیا حزبی هاڤێتیە و کراسێ نەتەوەیی کریە بەر خۆ؛ تنێ دەنگەکێ نە پێدڤی و زێدە د ناڤا ڤێ سیمفۆنیا نەتەوەیی دا مایە، هیڤییا مە ئەوە کو ل نێزیک ئەو دەنگ ژی ل گۆرەی ریتم و ئاوازا رەسەنا کوردی ئاموورێ کوردایەتیێ بژەنیت و هەر کەس و لایەنەک گوهداری سیمفۆنیا نەتەوەیی یا کوردستانێ بکەت، کاریگەریا خۆ بۆ چارەسەرکرنا دوزا رەوایا کورد هەبیت.
دۆزا گەلێ کوردستانێ و ڕۆژئاڤا ژ هزرا بەرتەنگا حزبێ مەزنترە
بلا بهێلین جیهان مە وەک نەتەوەکێ ئێکگرتی ببینیت، دا ڕێزێ ل مە بگرن و پشتەڤانییا نیڤدەولەتی بۆ مە زێدەتر لێ بھێت، بلا ئەم هەمی پێکڤە، ب ڕێزگرتن ل سیمبۆلێن نەتەوەیی، پشتەڤانییا هەوڵێن سەرکردایەتییا کوردستانێ بکەین، دا کو کەشتییا گەلێ کوردستانێ بگەھینینە کەنارێ ئارامیێ و ڕۆژئاڤا ژ ڤێ تەنگاڤیێ دەرباز ببیت.
ل دوماھیێ دبێژم: کوردایەتێ گەلەک پیرۆزترە ژ حزبایەتیێ.
