نڤێسین: ئازاد بەرواری
ل ژیانا ڕۆژانە دا، مرۆڤ حەز دکەت خودان هەڤالەکێ وەسا بیت یێ کو ل دەمێ تەنگاڤیان دا ل پێشیا هەمی کەسان ب ئەرکێ خۆ ڕادبیت؛ ب سەر و مال و حالێ خۆ هەول بدەت بەرەڤانیێ بکەت تا کو تەنگاڤی دەرباز دبیت. لێ پشتی هینگی، مافی ددەتە خۆ کو شیرەتان بکەت، ڕەخنەیان بگریت و کێماسیان دەستنیشان بکەت، داکو چ جاران ئەو پێشهاتە دووبارە نەبن و ئەگەر ڕوویدان ژی، مرۆڤ باشتر خۆ بۆ بەرهەڤ بکەت.
ئەو ڕووداوێن ل ڕۆژئاڤا هاتینە پێش، کو ئەم دشێین وەک “کارەسات” بناسین، بوونە ئەگەرێ هندێ کو گەلێ کوردستانێ ل ناڤخۆ و ل سەرتاسەری جیهانێ ببیتە ئێک دەنگ و ئێک دل، و سنگێ خۆ بکەنە چەپەر بۆ پاراستنا ڕۆژئاڤا. لێ نوکە دەمێ هندێ هاتیە کو ئەگەرێن وان پێشهاتان ژ ڕوانگەها ستراتیژییا بزاڤا ئازادیخوازیا کورد ل سەرتاسەری کوردستانێ بهێنە هەلسەنگاندن، و بۆ گەلێ کوردستانێ بەرچاڤڕوونیەکا زەلال بهێتە دیارکرن. ئەرێ گەلێ کوردستانێ چ دڤێت؟ و ئەڤ هەمی قوربانی و مالوێرانیە ژ پێخەمەت چ دهێنە دان؟
ل گەلەک وەرچەرخانێن گرنگ یێن کو ڕاستەوخۆ گرێدای چارەنڤیسێ نەتەوەی بن، پێدڤیە پارت و ڕێکخستنێن سیاسی ل شوینا کو خۆ ب “بریکارێ گەل” بزانن، گەلی ب “مامۆستایێ خۆ” بزانن. ئەو درووشمێن نوکە ل باکوور و ڕۆژئاڤا دهێنە بلندکرن ژ لایێ هندەک ئالیەکێ سیاسی ڤە —چ ب زانابوون یان ژی ژ ب نەزانی— پتر د خزمەتا بەرژەوەندیێن هێزێن دەستهەلاتدارێن هەرێمی (تورک، فارس و عەرەب) دانە. ئەگەر ئەڤ ئالیە ل خۆ نەزڤڕیپ، ڕەنگە ئەڤ چەندە ببیتە پەژیکەک و ل سەرتاسەری کوردستانێ بەلاڤ ببیت.
ل ڤێرە، ب دیتنا من گەلەک گرنگە ب زوترین دەم کۆنفرانسەک د چارچۆڤەکێ ئەکادیمی سیاسی دا، دوور ژ ئاراستەیا پارتیێن سیاسی بهێتە گرێدان، پێدڤیە کەسێن ئەکادیمی و ڕەوشەنبیرێن هەر چار پارچێن کوردستانێ ڤێ بابەتێ گەنگەشە بکەن و بڕیارەکا سیاسی یا ئێکدەنگ بدەن. ئەڤ بڕیارە وەک “مانیفێستۆیەکا گشتگیر” ببیتە بەرهەڤیەک بۆ گرێدانا کۆنگرەیەکی نەتەوەیی کو هەمی پارتیێن سیاسی تێدا پشکدار بن، و ئەنجامێن وی وەک بنەمایێن سەرەکی بۆ ئاسایشا نەتەوەیی بهێنە پەیڕەوکرن و چ لایەنەک مافێ لادانێ ژێ نەبیت.
دەربارەی “برایەتیا گەلان”، دڤێت ئەڤ چەمکە ژ ڕوانگەها بەرژەوەندیێن کوردستانێ بیت، نەک ژ ڕوانگەها بەرژەوەندیێن نەتەوەپەرستێن دەوروبەر یێن کو ب درووشمێن خاپینۆک کار دکەن. پشتی جەنگێ جیهانیێ ئێکێ و پارچەکرنا کوردستانێ، ڕژێمێن دەستهەلاتدار ل سەد سالێن دەربازبووی دەلیڤەیەکا زێڕین د دەست دا بوو کو ب نیەتەکا پاقژ برایەتیا گەلان جێبەجێ بکەن و د گەل کوردان دا ب وەکهەڤی بژین. لێ مخابن، پشکا کوردان تەنێ کوشتن، ئەنفال و وێرانکاری بوو. ئەڤە وێ چەندێ دسەلمینیت کو برایەتیا گەلان د ژێر سێبەرا ڤان دەستهەلاتێن شۆڤینی دا بڕیارەکا شاشە و نە د بەرژەوەندیا گەلێ مە دایە.
بەروڤاژی وێ، گەلێ کوردستانێ ل باشوور و د چارچۆڤەیێ قەوارەیەکێ فیدراڵ دا، بۆ جیهانێ سەلماند کو کورد باوەریەکا کویر ب برایەتیا گەلان هەیە، لێ د ناڤ دەستهەلات و ڕێڤەبەرییا کوردی دا. ئەڤرۆ ل باشوور، مافێ چ پێکهاتەکا نەتەوەیی یان ئایینی ناهێتە بنپێکرن و هەمی ب وەکهەڤی دژین. ئەڤ ئەزموونا باشوور دشێت ببیتە نموونە بۆ پارچێن دی یێن کوردستانێ.
گەلێ کوردستانێ ئێدی هشیارە و وێ سیستمێ خاپینۆک قەبوول ناکەت کو ل ژێر درووشمێ “برایەتیا گەلان” دێ ل ژێر دەستهەلاتەکا ناڤەندی یا زۆردار هێتە بڕێڤەبرن. هەر کەسێ هزر بکەت کو ل ژێر سێبەرا ڕژێمێن توندڕەو دا برایەتیا گەلان دێ هێتە چەسپاندن، یان مفایەک ژ مێژوویا سەد سالێن بووری وەرنەگرتیە، یان ژی ب زانابوون خزمەتا وان ڕژێمان دکەت.
بەلێ بۆ برایەتیا گەلان د چارچۆڤەیێ دەستهەلاتەکا فیدراڵ و سەربەخۆ دا، و نەک بۆ دووبارەکرنا ئەزموونا شکەستخواری یا برایەتیا گەلان ب دیتنا شۆڤینییا ناڤەندی دا.
